Энэ сарын 9, 10-ны өдрүүдэд болох “Эрдэнэт үйлдвэр” ТӨҮГ-ын 2023 оны эхний хагас жилийн үйл ажиллагааны тайлангийн хурал, “Өвөлжилтийн бэлтгэл-Эрдэнэс Монгол нэгдэл” удирдах ажилтны зөвлөгөөн, түүнд бэлтгэл хангах мэдээллийг даваа гарагийн ээлжит өргөтгөсөн шуурхай онцоллоо. Өөрөөр хэлбэл, Эрдэнэт үйлдвэрийнхэн оны эхний хагас жилийн үйл ажиллагаа, үйлдвэрлэл, эдийн засгийн үзүүлэлтийн тайлангаа Засгийн газрын Хэрэг эрхлэх газар болон “Эрдэнэс Монгол” ХХК-ийн Төлөөлөн Удирдах зөвлөлд танилцуулна.
Оны эхний хагас жилийн байдлаар Эрдэнэт үйлдвэрийн үйлдвэрлэл, эдийн засгийн төлөвлөгөөт үзүүлэлт сайн биелэлттэй, ашгийн болон татварын орлогын төлөвлөгөөг өндөр үзүүлэлтээр давуулсан хэдий ч үйлдвэрлэл тойрсон олон тулгамдсан асуудал, бэрхшээл бий. Энэ бүх асуудлаа төр засаг, удирдах түвшинд дэлгэрэнгүй танилцуулж, тодорхой шийдэл гарц эрэлхийлэх шаардлагатай. Хагас жилийн төлөвлөгөөгөө биелүүлэхэд бидний өмнө ямар асуудал тулгарав, ямар хүч хөдөлмөр, техник тоног төхөөрөмжтэй ажиллав, цаашид хэрхэн ажиллах гэх зэрэг бүхий л талаас нь ярьж, санал, бодлоо солилцох боломжтой гэж Ерөнхий захирал Г.Ёндон бүтцийн нэгжийн удирдлагуудад хийсэн мэдээлэлдээ дурдсан. Тайлангийн хуралд Засгийн газрын Хэрэг эрхлэх газар, Сангийн яам, Үндэсний аудитын газар, Татварын ерөнхий газар, Гаалийн ерөнхий газар, Төрийн худалдан авах ажиллагааны газар, Шударга өрсөлдөөн, хэрэглэгчийн төлөө газар зэрэг Засгийн газрын хэрэгжүүлэгч агентлагуудын удирдлагууд оролцож, төрийн байгууллагын хамтын ажиллагааны талаар мэдээлэл хийж, хэлэлцүүлэг зохион байгуулна. Түүнчлэн “Эрдэнэс Монгол” нэгдлийн харьяа компаниуд өвөлжилтийн бэлтгэл ажлын явцаа танилцуулж, энэ чиглэлээр цаашид хийж хэрэгжүүлэх үүрэг даалгавар, төлөвлөгөөг ярилцах юм байна.
Намар, өвлийн бэлтгэл ажлын хүрээнд 298 төрлийн ажил гүйцэтгэнэ
Үйлдвэрийн хэмжээнд намар, өвлийн бэлтгэл ажлын төлөвлөгөөний дагуу цех нэгжүүд ажиллаж байгааг Үйлдвэрлэлийн хэлтсээс мэдээлэв. Энэ жилийн намар, өвлийн бэлтгэл ажлын хүрээнд үндсэн технологийн тоног төхөөрөмжийн аюулгүй, найдвартай байдал, эрчим хүчний тоног төхөөрөмж болон системүүдийн бэлэн байдал, аж ахуй, нийгмийн барилга байгууламжийн бүтээн байгуулалт, түүхий эд материалын хангамж гэсэн дөрвөн чиглэлээр нийт 298 ажил гүйцэтгэхээр төлөвлөсөн байна. Эдгээр ажлууд 2023 оны батлагдсан төсвийн хүрээнд хийгдэх бөгөөд тодорхой хэсэг нь инженер техникийн ажилтнууд, засварчдын хүчээр дотоод нөөц бололцоог ашиглан хийж гүйцэтгэхээр төлөвлөгөөнд тусгагджээ.
Нар минутад мандаж минутад жаргана.
Үс засуулвал: 
Суудал: 
