Эрдэнэт үйлдвэрийн хэмжээнд хэрэгжиж буй хүний нөөцийн цогц хөтөлбөрийн оролцогчид “Үнэт зүйлээ бүтээцгээе” сэдвээр ярилцаж, санал бодлоо солилцлоо. “Шинэ ажилтны дасан зохицох”, “Залуу ажилтныг дэмжих”, “Манлайлал, авьяас чадвар”, “Залгамж” хөтөлбөрийн оролцогчдоо идэвхжүүлж, хамтдаа хөгжиж, үнэт зүйлээ бүтээлцэх зорилготой уг уулзалтыг Монгол Улсын сайд, Засгийн газрын Хэрэг эрхлэх газрын даргын зөвлөх Ү.Амарбат чиглүүлж, сургалт оров. Сургалтын гол агуулга нь “бид ажил алба, гэр бүл гэж аль нэг тал руугаа хэт чиглэх биш амьдралын бүхий л талын үнэт зүйлийг жигд хадгалж явах нь хүний хөгжлийн чухал хэсэг” гэсэн санааг хөндөж, олон талаас нь санал бодлоо солилцохыг зорьсон.
“Эрдэнэс Монгол” нэгдэл өөрийн харьяаны 30 гаруй үйлдвэр, компаниудтай олон талын харилцаа хамтын ажиллагаа явуулж байгаагийн нэг нь сургалт хөгжлийн хөтөлбөр юм. Тиймээс тэдгээрийн ажилтнуудыг сургаж хөгжүүлэх чиглэлээр бодлого, хөтөлбөр хэрэгжүүлж ажиллаж байгаа бөгөөд эдгээр бодлого, хөтөлбөрийг боловсруулахад Эрдэнэт үйлдвэрийн дотооддоо хэрэгжүүлж буй Хүний нөөцийн хөгжлийн цогц хөтөлбөр том жишиг загвар болжээ.
“Эрдэнэт үйлдвэрийн жишээнээс бусад компаниуд суралцах, туршлага судлах боломж хэдийнээ бүрдсэн байна. Ахмад, шинэ, залуу, удирдах ажилтнууддаа чиглэсэн хөгжлийн хөтөлбөрүүд тухайн байгууллагынхаа үндсэн үйл ажиллагаатай эн тэнцэхүйц чухал ач холбогдлоо өгчээ. Үүнтэй уялдуулаад дээрх хөтөлбөрт хамрагдаж буй нийт ажилтнуудад “Үнэт зүйлээ бүтээцгээе” сэдвээр сургалт зохион байгуулж байна” гэж Ү.Амарбат зөвлөх онцлов.