Чанарын менежментийн стандартын хэрэгжилтэд баталгаажуулалтын аудит хийнэ

Эрдэнэт үйлдвэрт хэрэгжиж буй чанарын менежментийн тогтолцооны ISO 9001:2015 стандартын хэрэгжилтийн явцад Монгол Улсын Стандарт Хэмжил зүйн газраас ирэх долоо хоногт баталгаажуулалтын аудит хийнэ. Шалгалтаар стандарт хэрэгжилт шаардлага хангаж, тэнцсэн тохиолдолд Эрдэнэт үйлдвэр, Олон улсын  ISO9001:2015 баталгаажуулалтын гэрчилгээтэй болно, гэж Чанарын хяналтын хэлтсээс мэдээллээ.  “Эрдэнэт үйлдвэр” ТӨҮГ өнгөрсөн оноос үйлдвэрийн газрын бүх түвшинд Чанарын менежментийн тогтолцооны ISO9001:2015 стандартыг нэвтрүүлсэн. Энэхүү төслийг “Обзервстар” ХХК-тай хамтран 165 ажилтны бүрэлдэхүүнтэй баг байгуулан хэрэгжүүлж байна. Чанарын менежментийн ISO9001:2015 Олон улсын стандарт нь “Төлөвлө-Гүйцэтгэ-Шалга-Сайжруул” мөчлөг болон эрсдэлд суурилсан сэтгэлгээ, нэгдмэл процесст суурилсан хандлага зэрэг менежментийн 3 тулгуурт онол дээр суурилсан дээд эрэмбийн стандарт юм. Олон улсын стандарт тус үйлдвэрт нутагшсанаар үйлдвэрийн газрын онцлогт тохирсон Чанарын бодлоготой болж, ажилтан бүр чанарын менежментийн тогтолцооны асуудлыг тодорхойлон, үйлдвэрийн газрын цаашдын төлөвлөлтөд гар бие оролцох үйл явцыг бий болгосон байна. Түүнчлэн бүх бүтцийн нэгжүүд өөрийн соёл, мэдлэг ойлголт, чадавх, зохион байгуулалт, үйл ажиллагааг сайжруулахдаа чанарын ойлголтыг шингээж, улмаар харилцан хоорондоо хэрэглэгч байж, хамтын хөгжлийг чухалчлан, хэрэглэгчдэд төвлөрсөн байгууллага болох үндэс тавигдсан зэрэг олон эерэг өөрчлөлтүүд гарсныг төсөл хэрэгжүүлэгчид онцоллоо. 
Эрдэнэт үйлдвэрийн Чанарын хяналтын хэлтэс Олон улсын стандартын дагуу чанарын менежментийн тогтолцоонд байнгын сайжруулалт хийж, 2025 оноос ISO9001 суурьтай чанар, байгаль орчин, эрүүл мэнд, эрчим хүч, мэдээлэл технологийн нэгдсэн менежментийн тогтолцооны үндсийг тавих зорилт дэвшүүлэн ажиллаж байна.