Энэ он гарсаар Эрдэнэт үйлдвэрт шинээр ажилд орсон 200 гаруй ажилтан хувь хүний хөгжлийн үндсийг судаллаа. Тус үйлдвэрийн Хүний нөөц, захиргааны хэлтсээс сүүлийн дөрвөн жилд хүний хөгжлийн цогц хөтөлбөр хэрэгжүүлэн, олон улсын багц стандартыг үйлдвэрийнхээ хөрсөнд нутагшуулж буй. Үүний нэг хэсэг нь “Шинэ ажилтны дасан зохицох” хөтөлбөр бөгөөд шинээр ажилд орсон ажилтнуудын урам зориг, ур чадвар, хувь хүний харилцаа хандлагад оюуны хөрөнгө оруулалт болсон цуврал сургалтууд юм. Нөгөө талаар хувь хүний хөгжлийн сургалтууд шинээр ажилд орсон болон залуу ажилтнуудын хамгийн их эрэлт хэрэгцээтэй сэдэв болдог гэж зохион байгуулагчид онцолсон.
Хүний нөөц, захиргааны хэлтсийн Хүний нөөцийн албаны дарга Б.Одгарьд сургалтын үйл ажиллагааг нээж хэлсэн үгэндээ, “Шинэ, залуу ажилтнууддаа зориулан олон талын бодлого хөтөлбөр, үйл ажиллагаа зохион байгуулж байна. Үүнд идэвхтэй оролцож, энэ боломжийг алдалгүй зөв ашиглан өөрийгөө хөгжүүлж, Эрдэнэт үйлдвэрийн ирээдүйн үнэ цэнтэй ажилтан болох эх сууриа сайн тавиасай” гэж сургалтын ач холбогдлыг тодорхойлов.
Шинэ ажилтны дасан зохицох хөтөлбөр болон Залуу ажилтныг дэмжих хөтөлбөрийн оролцогчдыг хамруулсан “Хувь хүний хөгжлийн үндэс” сургалтыг “Хан голомт” төвийн хуульч, профессор, Зөвлөх багш Ц.Азбаяр удирдан, өөрийгөө зөв үнэлж, илэрхийлэх, хүний хөгжлийн гурван багана, үнэлэгдэх ба хүндлэгдэх шалтгаан, давуу талаа хөгжүүлж, сул талаа засах нь, өөртөө шүүмжлэлтэй хандах чадвар зэрэг сэдвээр хичээл заалаа. Хүний хөгжлийн “Хан голомт” төвийн багш нар өмнө нь Эрдэнэт үйлдвэрийн Манлайлал, авьяас чадварын хөтөлбөрийн оролцогчдод цуврал сургалт зохион байгуулж байсан бол энэ сургалтаараа хоёр дахь жилдээ хамтран ажиллаж байгаа аж.
“Шинэ ажилдаа дасан зохицож, байгууллагадаа иргэншиж, төлөвшихөд нь туслах, удирдлага хамт олонтойгоо нэгдэж зохицоход зөвлөгөө зөвлөмж, мэдлэг олгоход сургалтын зорилго оршдог. Хамгийн гол нь байгууллагадаа үнэнч тогтвортой ажиллаж, тасралтгүй хөгжиж байх гол үндсийг хэлж өгч байгаагаараа чухал” гэж Зөвлөх багш Ц.Азбаяр ярилаа.
Сургалтын үеэр Хүний нөөц, захиргааны хэлтсийн удирдлагууд шинээр ажилд орсон ажилтнуудад шинэ ажилтны багц бэлгийг гардуулав.
Нар минутад мандаж минутад жаргана.
Үс засуулвал: 
Суудал: 
