Эрдэнэт үйлдвэр 2022 оны “Шилдэг байгууллага”-аар шалгарлаа
“Эрдэнэт үйлдвэр” ТӨҮГ, өнгөрсөн 2022 оны ажлын үзүүлэлтээрээ “Шилдэг байгууллага”-аар шалгарч, өргөмжлөл цомын эзэн боллоо. Эл шагналыг Монгол Улсын Ерөнхий сайд Л.Оюун-Эрдэнэ, үндэсний их баяр наадам Ардын хувьсгалын 102 жилийн ойн босгон дээр тус үйлдвэрийн Ерөнхий захирал Г.Ёндонд гардуулан, баяр хүргэсэн байна. Эрдэнэт үйлдвэр нь “Алсын хараа-2050” Монгол Улсын урт хугацааны хөгжлийн бодлого”, “Шинэ сэргэлтийн бодлого”, Засгийн газрын үйл ажиллагааны хөтөлбөрийг амжилттай хэрэгжүүлэхэд компанийн засаглалыг сайжруулж, борлуулалтын орлого, ашигт ажиллагаа, хөрөнгийн өгөөжийг нэмэгдүүлэн, ил тод, хариуцлагатай , үр ашигтай, ажиллаж, Монгол Улсын 2022 оны нийгэм, эдийн засагт үнэтэй хувь нэмэр оруулан манлайлж ажилласныг ийнхүү үнэлэн, “Шилдэг байгууллага”-аар өргөмжилжээ. Энэхүү үйл явдлыг Ерөнхий захирал Г.Ёндон даваа гаригийн өргөтгөсөн шуурхай зөвлөгөөний үеэр танилцуулж, Эрдэнэт үйлдвэрийн хамт олны хамтын хүч хөдөлмөр, сэтгэл зүтгэлээ шингээн ажилласны үр шим гэдгийг онцлон, нийт уурхайчдадаа баяр хүргэж, амжилт хүслээ.
Оюутын ордод 7560 тууш метр өрөмдлөгийн ажил гүйцэтгээд байна
Энэ оны 5 сард эхлэн өнөөг хүртэл хоёр сар гаруй хугацаанд үргэлжилж буй Эрдэнэтийн-Овоо ордын зүүн өмнөд хэсэгт байрлах Оюутын ордын нарийвчилсан хайгуулын ажлын явцаас Ерөнхий геологич Д.Алтанхуяг мэдээлэл хийв. Өнөөдрийн байдлаар, тус орд газарт нийт 12 цооногийн бүрэн өрөмдлөг хийж дуусгасан бол дөрвөн цооногт өрөмдлөгийн ажил үргэлжилж байна. Энэ нь эхний жилд хийхээр төлөвлөсөн 14 мянган тууш метр газрын гүний хайгуулын 54 хувь буюу 7560 тууш метр орчим талбайг эзэлж байгаа юм. Нийт өрөмдсөн цооногийн агууламжийг харахад ямар нэг хэмжээний хүдэршилттэй болох нь тогтоогджээ. Өөрөөр хэлбэл, хайгуулын үр дүнд хүдэршилтийн хэмжээ нь ядуу, энгийн, баян агууламжтай байгаа эсэхийг чанарын түвшинд баримтжуулалт хийх явцад нүдэн баримжаагаар тогтоох боломжтой аж. Гэхдээ лабораторийн шинжилгээгээр тоон байдлаар агуулгыг тодорхойлох ёстой гэж Ерөнхий геологич мэдээлэлдээ онцоллоо. Одоогоор дээрх өрөмдсөн 4 цооногийн дээжийн шинжилгээний хариу ирсэн бөгөөд нийт 34 төрлийн элементээр шинжилж тодорхойлоход зэсийн агуулга л гэхэд 0.39 хувьтай гарчээ. Түүнчлэн өрөмдлөг хийсэн цооног бүр өөр өөр хүдрийн агуулгатай, баян, ядуу хосолсон байдалтай байгааг ч геологчид мэдээлсэн. Эрдэнэт үйлдвэрийн геологичид Оюутын ордын нарийвчилсан хайгуулыг гадны багтай хамтран хийж буй бөгөөд орчин үеийн шинэ дэвшилтэт технологи нэвтрүүлэн ажиллаж байна.