Монгол Улсын Ерөнхийлөгч У.Хүрэлсүхийн урилгаар манай улсад төрийн айлчлал хийж буй Бүгд Найрамдах Киргиз Улсын Ерөнхийлөгч Садыр Нургожоевич Жапаров өнөөдөр Орхон аймаг, Эрдэнэт хотноо хүрэлцэн ирж, “Эрдэнэт үйлдвэр” ТӨҮГ-т ажлын айлчлал хийлээ. Түүнийг Орхон аймгийн ИТХ-ын дарга Д.Мөнхбат, Засаг дарга С.Батжаргал, “Эрдэнэт үйлдвэр” ТӨҮГ-ын Ерөнхий захирал Г.Ёндон, Ерөнхий инженер Т.Батмөнх болон албаны бусад хүмүүс, уурхайчдын төлөөлөл угтан авав.
Бүгд Найрамдах Киргиз Улсын Ерөнхийлөгч С.Н.Жапаровыг Монгол Улсын сайд, Засгийн газрын Хэрэг эрхлэх газрын дарга Д.Амарбаясгалан, Гадаад харилцааны сайд Б.Батцэцэг, Монгол Улсаас Бүгд Найрамдах Киргиз Улсад суугаа Онц бөгөөд Бүрэн Эрхт Элчин сайд С.Ганхуяг, Бүгд Найрамдах Киргиз Улсаас Монгол Улсад суух Онц бөгөөд Бүрэн Эрхт Элчин сайд А.М.Артыкбаев болон албаны хүмүүс дагалдан ирлээ.
Киргиз Улсын Ерөнхийлөгч С.Н.Жапаров энэхүү айлчлалынхаа хүрээнд ордын нөөц, хүчин чадлаараа Ази тивд эхний тавд бичигддэг зэсийн том уурхай Эрдэнэт үйлдвэрт зочилж, тус үйлдвэрийн үйл ажиллагаа, зэсийн хүдрийг ялгах, боловсруулах технологийн талаар туршлага судалж, танилцах зорилготой байв. Тэрээр дагалдан яваа бүрэлдэхүүний хамт “Эрдэнэтийн-Овоо”-ны уурхайн бүсэд зочилж, Ил уурхай, Баяжуулах үйлдвэрийн үйл ажиллагаатай биечлэн танилцсан. Энэ үеэр “Эрдэнэт үйлдвэр” ТӨҮГ-ын Ерөнхий захирал Г.Ёндон, үйлдвэрийнхээ талаар дэлгэрэнгүй танилцуулга хийж, хүдэр олборлолт, боловсруулалт, бүтээгдэхүүн үйлдвэрлэл, хүчин чадал, эдийн засгийн үр өгөөж, цаашдын зорилт, хөгжлийн үндсэн чиглэлээр мэдээлэл өгсөн юм. Ерөнхийлөгч С.Н.Жапаров мэдээлэлтэй холбогдуулан Монгол Улсын эдийн засгийн гол хүч болж ирсэн Эрдэнэт үйлдвэрийн хөгжил, улс орны болоод ард иргэдийн ахуй амьдралд үзүүлж буй хувь нэмрийг онцлон сонирхсон. Түүнчлэн, айлчлалын хүрээнд Монгол, Киргиз хоёр орны найрамдлын бэлгэдэл болгож, Эрдэнэт хотноо “Ногоон төгөл” байгуулахаар ярилцлаа.
Киргиз Улсын Ерөнхийлөгч С.Н.Жапаровын уулын баяжуулах Эрдэнэт үйлдвэрт хийсэн ажлын айлчлалын үеэр түүнийг дагалдан яваа Монгол Улсын Гадаад харилцааны сайд Б.Батцэцэгээс энэхүү төрийн айлчлалын онцлог, ач холбогдлын талаар тодруулав.
Тэрээр, Киргиз Улсын Ерөнхийлөгч С.Н.Жапаровын манай улсад хийж буй төрийн айлчлалд Монгол Улсын Ерөнхийлөгч У.Хүрэлсүх өндөр ач холбогдол өгч байгааг онцлоод, айлчлалын хүрээнд хоёр орны харилцаа, хамтын ажиллагааг шинэ шатанд гаргах, өөрөөр хэлбэл, дипломат харилцаа тогтоосны дараагийн 30 жилд гарах өөрчлөлт, хөгжлийг бэхжүүлэх талаар дэлгэрэнгүй санал солилцож, албан ёсны хэлэлцээр хийж, хамтын ажиллагааны хамтарсан тунхаг бичиг гаргалаа. Киргиз улс 7 сая хүн амтай, далайд гарцгүй, хөгжиж буй орон гэдгээрээ манай улстай нэлээд төстэй. Тиймээс харилцан бие биеэсээ туршлага судлах, тэр тусмаа хөрөнгө оруулалт, үйлдвэржилт, хөдөө аж ахуй, уул уурхайн салбарын хамтын ажиллагааны чиглэлээр санал бодол солилцож ярилцсан. Ер нь бүхий л салбарын хамтын ажиллагааг шат ахиулан хөгжүүлэх зорилготой айлчлал боллоо гэж хэлж болно” гэв. Бүгд Найрамдах Киргиз Улсын Ерөнхийлөгч Монгол Улсад хийж буй энэ удаагийн төрийн айлчлал нь тус улсын Төрийн тэргүүний түвшинд 21 жилийн дараа болж буй түүхэн айлчлал юм.