"ДЭЭЛТЭЙ МОНГОЛ" наадмын шилдгүүд тодорлоо

          Ардын хувьсгалын их баяр наадмын нэгэн чимэг нь Үндэсний дээл хувцсаараа ижилсэн гоёдог "Дээлтэй Монгол" наадам юм. Жилээс жилд хүрээгээ тэлж, оролцогчдын тоо нэмэгдэн төгөлдөржиж буй тус наадам уламжлал ёсоор Үндэсний их баярын эхний өдөр болж, шилдгүүдээ тодрууллаа.           Энэ удаагийн "Дээлтэй Монгол" наадмыг Орхон аймгийн Засаг даргын тамгын газар, "Эрдэнэт үйлдвэр" ТӨҮГ хамтран зохион байгуулсан бөгөөд нийт долоон байгууллага, 14 хос, 14 гэр бүлийн 500 гаруй хүн оролцож, Монгол үндэсний дээл хувцасныхаа гайхамшигт соёлыг түгээн дэлгэрүүллээ.           Үндэсний өв соёлоо хадгалж, үр хойчдоо бахархал болгон өвлүүлэн үлдээхэд өндөр ач холбогдолтой тус наадмын Шилдэг байгууллагаар Баян-Өндөр сумын Засаг даргын тамгын газрын хамт олон тодорсон юм.           Түүнчлэн, наадмын "Шилдэг иж бүрэн үндэсний хувцастай гэр бүл"-ээр "Эрдэнэт үйлдвэр" ТӨҮГ-ын Барилга засварын цехийн Засал чимэглэлч М.Гэрэлмаагийн гэр бүл шалгарч, тус үйлдвэрийн Ерөнхий захиргааны Гадаад харилцааны мэргэжилтэн У.Нармандахын гэр бүл удаах байранд, Баяжуулах үйлдвэрийн Хөвүүлэн баяжуулагч Б.Цацралын гэр бүл гутгаар байранд тус тус шалгарсан. Наадмын "Шилдэг иж бүрэн үндэсний хувцастай хос"-оор Ерөнхий захиргааны Гадаад харилцааны мэргэжилтэн У.Нармандах, эхнэр Б.Гантуяагийн хамт шалгарсан бол “Эрдэнэт цогцолбор” дээд сургуулийн техникч Б.Эрдэнэтулга, дадлагажигч П.Ганзаяа, Баяжуулах үйлдвэрийн жолооч Б.Шагдарсүрэн нар гэр бүлийн хамтаар удаах байрын эздээр тодорлоо.