Уурхайчин багш, шавийн залгамж холбоо хүрээгээ тэлэн бэхжиж байгаа нь Эрдэнэт үйлдвэрт хэрэгжүүлж буй Хүний нөөцийн хөгжлийн цогц хөтөлбөрийн үр дүн юм. Тус үйлдвэрийн Хүний нөөц, захиргааны хэлтсээс “Шинэ ажилтны дасан зохицох”, “Залуу ажилтныг дэмжих”, “Залгамж”, “Манлайлал, авьяас чадвар” гэсэн хүний нөөцийн хөгжлийн цогц хөтөлбөрийг 3 дахь жилдээ хэрэгжүүлж байна. Хөтөлбөрийн зорилго нь үйлдвэрийн хүний нөөцийн менежментийн үйл ажиллагааг сайжруулан, ажилтнуудын чадамжид тулгуурлан, өндөр бүтээмжтэй, тогтвортой ажиллах хүний нөөцийн хөгжлийг дэмжиж, үйлдвэрийн үр ашгийг нэмэгдүүлэхэд чиглэгддэг. Эдгээр хөтөлбөрүүдийн нэг гол үйл ажиллагаа нь ахмад болон залуу ажилтнуудын хоорондын залгамж чанарыг бэхжүүлж, багш шавийн холбоог бодлогын түвшинд дэмжих үйл явц юм.
Энэ хүрээнд “Залуу ажилтныг дэмжих” хөтөлбөрийн багш шавийн гарын үсэг зурж, батламж гардуулах ёслол өнөөдөр боллоо. Багш, шавийн холбоог бодлогын түвшинд дэмжсэнээр дадлага туршлагатай багш ажилтнаар дамжуулан хүний нөөцийн хөгжлийн дараагийн шинэ үеийг авчрахыг зорьж буйг Хүний нөөц, захиргааны хэлтсийн дарга О.Отгонбаяр тус ёслолын ажиллагааны үеэр онцлов. Түүнчлэн “Хөгжлийн цогц хөтөлбөрүүд хоорондоо уялдаа холбоотой хэрэгждэг. Залуу ажилтныг дэмжих хөтөлбөрийн багш шавийн батламжийг “Манлайлал, авьяас чадвар” болон “Залгамж” хөтөлбөрийн багш нар гардаж байгаа нь үүнийг гэрчилнэ. Залуу ажилтнуудынхаа итгэл найдварыг хүлээж, багшаар сонгогдсон дадлага туршлагатай ажилтнуудад баяр хүргэе. Мэргэжлийн ур чадвар, хувь хүний төлөвшил, хичээл зүтгэл, давуу тал, үнэт зүйлээрээ манлайлж, шинэ залуу ажилтнуудад өөрийн сайн туршлага, мэдлэг чадвараа харамгүй хуваалцаж сургана гэдэгт итгэл дүүрэн байна” хэмээгээд багш, шавь нарт амжилт хүссэн юм.
Үйлдвэрийн хэмжээнд гурав дахь жилдээ хэрэгжиж буй Хүний нөөцийн хөгжлийн цогц хөтөлбөрт энэ жил 460 орчим ажилтан хамрагдаж, мэдлэг мэргэжил, авьяас ур чадвараа хөгжүүлж байна. Хөтөлбөрийн үр дүн, үйл ажиллагааг оны төгсгөлд дүгнэх юм байна.
Нар минутад мандаж минутад жаргана.
Үс засуулвал: 
Суудал: 
