Эрдэнэт үйлдвэрийн дэргэдэх “Энэрэл” хүүхдийн төвийн Хөдөлмөр зуслангийн нээлт “Дэлэнгийн ам”-нд өнөөдөр боллоо. Уламжлал ёсоор 8-р сарын 20 хүртэл зуслангийн үйл ажиллагаа үргэлжлэх аж. Энэхүү хөдөлмөр зусланд хүүхэд багачуудын дунд гар урлалыг хөгжүүлэх, цагаа идээ боловсруулах, хүндэт зочидтой танилцах, нохойн хошуу, таван салаа гэх мэт ургамал түүж бэлтгэн хатаах зэрэг олон төрлийн хөтөлбөрийг амжилттай хэрэгжүүлж байна. Мөн дөрөв, зургаагийн харьцаатай хүлэмжид нарийн ногоо тарьжээ. Одоо “Энэрэл” төвийн хөдөлмөр зусланд 50 хүүхэд зуныхаа амралтыг үр бүтээлтэй өнгөрүүлж байна. “Энэрэл” хүүхдийн төвийн эрхлэгч М.Майцэцэгийн сэтгэгдлийг сонсоход: “Манай “Энэрэл” хөдөлмөр зуслан 30 жил үйл ажиллагаагаа явуулж ирсэн түүхтэй. Хүүхдүүдийг зуны улиралд чийрэгжүүлэх, ажил хөдөлмөрт сургах нь зуслангийн нэг эрхэм зорилго. Мөн хүүхдүүдийг дулааны улиралд эко орчинд өсгөж хүмүүжүүлж байгаа нь тэдний эрүүл мэндэд онцгой ач холбогдолтой. Сүүлийн нэг, хоёр жил цар тахлын нөхцөл байдлаас шалтгаалан цахимаар хичээл орсон нь хүүхдийн сурлагын хоцрогдолд нөлөөлсөн. Дээр нь секц, дугуйлан хичээллээгүй. Эдгээрээс шалтгаалан хүүхдүүдийн нийгмийн идэвх буурсан. Энэ бүхнийг нөхөх зорилгоор хүүхдүүдийн дунд олон төрлийн уралдаан тэмцээн зохион байгуулж байна. Уг тэмцээнүүдэд манай төвийн хүүхдүүд ганзага дүүрэн амжилттай оролцсонд багшийн хувьд баяртай байна. Манай төвийн гурван хүүхэд “Хангарди” спорт клубийн нэр дээр хөл бөмбөгийн шигшээ багийн дээд лигт тоглож байна. Хоёр хүүхэд англи хэлний их сорилгын шалгалтад бэлтгэгдэж байна. Нэг хүүхэд Боловсролын их сургуулийн Биеийн тамирын ангийн оюутан боллоо. Энэ жил Архангай аймагт Скаутын холбооны 100 жилийн ойд зориулсан бүсийн Майхан цугларалт болсон. Уг цугларалтад манай арга зүйч Х.Баярмаа хүүхдүүдтэйгээ саяхан амжилттай оролцоод ирлээ” гэв.
Нар минутад мандаж минутад жаргана.
Үс засуулвал: 
Суудал: 
