Удирдах ажилтнуудын шуурхай зөвлөгөөний тойм

“Их зогсолт”-той шинэ долоо хоног эхэллээ

Эрдэнэт үйлдвэрийн хэмжээнд ээлжит “Их зогсолт”-ыг энэ долоо хоногийн Баасан гаригт эхлүүлнэ. Удирдлагуудын энэ удаагийн өргөтгөсөн шуурхай зөвлөгөөний гол сэдэв энэ байв. Эрдэнэт үйлдвэр жилд нэг удаа үйлдвэрлэлийн үндсэн үйл ажиллагаа, тасралтгүй горимын аюулгүй байдлыг хангах зорилгоор нөөцгүй техник, тоног төхөөрөмждөө иж бүрэн засвар үйлчилгээ хийдэг. Өөрөөр хэлбэл, тодорхой хугацаанд үйлдвэрийн хэмжээнд “Их зогсолт” зохион байгуулж, нарийн бэлтгэл, төлөвлөгөөний дагуу богино хугацаанд бүх тоног төхөөрөмжөө засаж, хүч сэлбэдэг. Энэ жилийн “Их зогсолт” хийх бэлтгэл ажил үндсэндээ 100 хувь хангагдсан, гэж Механикийн хэлтсийн дарга Б.Чинзориг илтгэлдээ танилцуулав. Тухайлбал, өнөөдрийн байдлаар, бүх цех нэгжүүд ХАБЭА-н хамгаалах хэрэгслийн жагсаалт гаргаж, бэлэн болгосон бол Чанарын хяналтын хэлтэс дээр хийгдэх ажлын багаж, тохиргоо, хэмжилтүүдийн захиалгыг нарийвчлан гаргаж өгчээ. Мөн Ерөнхий диспетчерт шаардлагатай бүх тоноглол, тусгай болон бусад зориулалтын тээврийн машины захиалга хүргүүлж, нарийвчилсан төлөвлөгөөг гаргасан байна. Түүнчлэн, энэ үеэр ажиллах ажилчдын халуун хоолны хуваарилалтыг өнөөдөр эцсийн байдлаар гаргаж өгөхийг холбогдох мэргэжилтэнд хариуцууллаа. “Их зогсолт”-ын бэлтгэл ажлыг хангах, зохион байгуулах өргөтгөсөн штабын хурал ирэх пүрэв гаригт хуралдаж, үүнд үйлдвэрийн Ерөнхий захирал, Ерөнхий инженер болон бүтцийн бүх цех нэгж, гаднын гүйцэтгэгч компанийн удирдлагууд оролцож, бэлтгэл ажил, бэлэн байдлыг эцсийн байдлаар хэлэлцэх юм байна. Ингэснээр баасан гарагт эхлэх “Их зогсолт”-ын бэлтгэл ажил хангагдаж дуусах ажээ. 

Эрүүл мэндийн урьдчилан сэргийлэх үзлэгт идэвхтэй хамрагдахыг анхааруулав

Нийгмийн хариуцлагын хүрээнд Эрдэнэт үйлдвэр, ахмадууд, мэргэжлээс шалтгаалах өвчний улмаас хөдөлмөрийн чадвар алдалтын хувь тогтоолгосон ажилтан, нийт уурхайчдаа эрүүл мэндийн иж бүрэн үзлэг оношилгоонд хамруулдаг. 2023 оны урьдчилан сэргийлэх үзлэгт нийт 9000 гаруй хүн хамруулахаар, өдөрт 55 хүнд эрүүл мэндийн үзлэг, оношилгоо хийхээр төлөвлөн ажиллаж буйг “Эрдэнэт Медикал” эмнэлгийн Үйл ажиллагаа хариуцсан орлогч захирал Л.Туул мэдээллээ. Өнгөрсөн 4 дүгээр сарын 17-нд эхэлсэн урьдчилан сэргийлэх үзлэгт энэ сарын 23-ны байдлаар 2486 хүн хамрагдаад байна. Энэ нь өдөрт 55 хүн хамруулах төлөвлөсөн тоонд хүрэхгүй байгаа бөгөөд оны төгсгөлд үзлэг дуусахгүй байх эрсдэл үүсэж болзошгүй байгаа аж. “Эрдэнэт Медикал” эмнэлэг үйлдвэрийн ажилтнуудын урьдчилан сэргийлэх үзлэгийг зохион байгуулахаас гадна Орхон аймаг болон бусад аймаг, орон нутгийн иргэдэд Засгийн газрын бодлого шийдвэрийн дагуу эрүүл мэндийн тусламж үйлчилгээг оны эхнээс урьдчилан төлөвлөсний дагуу хүргэн ажиллаж байна. Иймд бүтцийн нэгжийн удирдлагууд ажилтнуудаа эрүүл мэндийн үзлэгт цаг хугацаанд нь бүрэн хамруулахад анхаарч, идэвх санаачилга гарган ажиллахыг тус эмнэлгийн зүгээс хүсэв.