Уул уурхайн салбарт мэргэжлийн боловсон хүчин бэлтгэх зорилгоор 1975 онд “Сургалтын төв” нэртэй байгуулагдан, эдүгээ ШУТИС-ийн харьяа цогцолбор сургууль болж өргөжсөн “Эрдэнэт цогцолбор” дээд сургуулийн 24 дэх төгсөлтийн баяр өнөөдөр боллоо. Тус сургууль дээд мэргэжилтэй уул уурхайн инженер, техникийн ажилтнууд бэлтгэж эхэлснээс хойш ийнхүү 24 дэх хаврын улирлаа үдэж байна. 2022-2023 оны хичээлийн жил “Эрдэнэт цогцолбор” дээд сургуулийн хувьд түүхэн үйл явдал, ололт амжилтаар дүүрэн байсныг захирал, доктор Д.Зоригтхүү нээлтийн эхэнд онцолсон. Тэрээр хэлсэн үгэндээ, “Боловсролын байгууллагын менежментийн тогтолцоо ISO 21001 стандартыг нэвтрүүлсэн бол Ахлах сургууль олон улсын Кембрижийн хөтөлбөрөөр анхны элсэлтээ хүлээн авлаа. Түүнчлэн шинээр техникийн боловсрол олгох тусгай зөвшөөрөл авч, гурван мэргэжлээр элсүүлэн Политехник коллежийн үйл ажиллагааг эхлүүлэх шинэ хуудас нээлээ. Олон улсын ISO 96006 стандартын дагуу дэлхийд ажиллах эрх бүхий гагнуурчид бэлтгэдэг боллоо. Монгол Улсын Засгийн газрын 293 дугаар тогтоолын дагуу багш ажилтнуудын эгнээ өргөжлөө” хэмээн, 24 дэх удаагийн төгсөлтийг хамтдаа бүтээсэн эрхэм багш ажилтнууд, төгсөгч оюутнууддаа баяр хүргэж мэндчилэв.
Нээлтийн ажиллагаанд “Эрдэнэт үйлдвэр” ТӨҮГ-ын Ерөнхий захирал, Геологи-минералогийн ухааны доктор Г.Ёндон, ШУТИС-ийн захирал, доктор, профессор Т.Намнан, Эрдэм шинжилгээ, технологийн газрын захирал, доктор, профессор Д.Цолмонбаатар, “Эрдэнэт үйлдвэр” ТӨҮГ-ын Ерөнхий инженер, Монгол Улсын Аж үйлдвэрийн гавьяат ажилтан Т.Батмөнх болон тус сургуулийн Эрдмийн зөвлөлийн гишүүд, бусад удирдлагууд, багш оюутнууд, эцэг эхчүүд оролцон , “Эрдмийн баяр”-аа тэмдэглэлээ.
"Эрдэнэт үйлдвэр" ТӨҮГ-ын Ерөнхий захирал Г.Ёндон баяр хүргэж, хэлсэн үгэндээ, "Өнөөдөр энд бакалавр, магистрын дипломоо гардан авахаар хүрэлцэн ирсэн, өнгөрч буй 4,5 жилд маш их хичээж суралцсан төгсөгчид, өөрийн эрдэм мэдлэгээ шавь нартаа харамгүй зааж сургасан эрдэмтэн багш нартаа, сургуулиа амжилттай төгсөж буй хүүхдүүдээрээ бахархаж байгаа эцэг эхчүүд та бүхэнд “Эрдмийн баяр”-ын халуун мэнд хүргэе. Эрдэнэт үйлдвэрийн дэргэдэх “Эрдэнэт цогцолбор” дээд сургууль олон жил уул уурхайн салбарт мэргэжлийн инженер, техникийн ажилтныг бэлтгэж ирсэн арвин туршлагатай. Тэгвэл өнгөрсөн оноос Монгол Улсын Засгийн газрын тогтоолоор МУИС-ийн тодорхой бүрэлдэхүүн хэсгийг нэгтгэж, нийгмийн чиглэлийн мэргэжилтнүүдийг бэлтгэж эхэлсэн нь дараагийн дэвшил, туршилгад хөтлөх онцлог үйл явдал, ололт боллоо. Эрдэнэт үйлдвэрийн зүгээс энэ сургуулиа үргэлж дэмжиж, эндээс суралцаж төгссөн олон төгсөгчид өнөөдөр манай үйлдвэрийн цех, нэгжийн удирдлага, үйлдвэрлэлийн үйл ажиллагааг гардан хариуцдаг чадварлаг мэргэжилтнүүд болон ажиллаж буйг тэмдэглэхэд таатай байна. Бид саяхан тус сургуулийн стратеги төлөвлөгөөг боловсруулах ажлын хэсэг байгуулан, ажиллаж эхэлсэн. Эрдэнэт үйлдвэр дэлхийн хэмжээний үйлдвэр учраас үйлдвэрлэлд хамгийн сүүлийн үеийн дэвшилтэт техник, технологи нэвтрүүлж байна. Түүнийг дагаад тэнд өндөр мэдлэг, мэргэжлийн ур чадвар хэрэгтэй болно. Тиймээс төгсөгчид болон сургуулийн сургалтын чанар арга барилаас илүү ихийг хүсэж, тэр хэмжээгээр дэмжин хамтран ажиллах болно. Энэ хүрээнд цаашид сургалт үйлдвэрлэлийг холбосон гүүр нь байхыг эрхэмлэнэ” гэж онцоллоо. Ингээд 2022-2023 оны хичээлийн жилийн хаврын улирлын 24 дэх төгсөлтийн төгсөгчдөд бакалавр, магистрын зэрэг, диплом гардуулж, ажил амьдралын өргөн далайд сэлүүр алдахгүй, амжилт дүүрэн аялахын ерөөл дэвшүүлэв.
Нар минутад мандаж минутад жаргана.
Үс засуулвал: 
Суудал: 
