Мөн энэ өдөр “Манлайлал, авьяас чадвар”-ын хөтөлбөрийн оролцогчид “Сэтгэл зүйн эрүүл мэнд, амьдралын чанар” сэдэвт сургалтад оролцож, энэ чиглэлийн анхны хичээлээ сонслоо. Эрдэнэт үйлдвэрийн хөгжил, ирээдүйг хөтлөх түлхүүр ажилтнуудыг бэлдэж буй “Манлайлал, авьяас чадвар”-ын хөтөлбөр оролцогчдоо олон талаас нь сургаж, хөгжүүлж буйн нэг нь энэхүү сэтгэлзүйн сургалт юм. Оролцогчдод харилцааны болон ажлын байрны сэтгэл зүй, удирдах ажилтны сэтгэл зүйн хичээлийг Сэтгэл судлалын Үндэсний төвийн Гүйцэтгэх захирал, багш Б.Ууганцэцэг, Сэтгэл судлаач Г.Золжаргал нар зааж, харилцан ярилцах хэлбэрээр зохион байгууллаа. Сэтгэл зүйн сургалтад тус хөтөлбөрийн 80 гаруй оролцогч хамрагдсан байна.
Энэ үеэр сургалтын багш, Сэтгэл судлалын Үндэсний төвийн Гүйцэтгэх захирал Б.Ууганцэцэг “Манай Сэтгэл судлалын үндэсний төв Эрдэнэт үйлдвэртэй олон талын хамтын ажиллагаатай ажиллаж байна. Үүний нэг хэсэг нь 2020 оноос эхлүүлсэн хүний хөгжлийн хөтөлбөрийн сургалт. Энэ хүрээнд бид сэтгэлзүйн ганцаарчилсан төлөвлөгөө, бүлгийн зөвлөгөө, нөлөөллийн сургалтыг зохион байгуулж ирсэн. Бид өмнө нь сургалтаа цахимаар хийж байсан бол энэ удаа биечлэн танхимд явуулж, нүүр тулан ярилцаж байна. Сэтгэл зүйн сургалтад хамрагдсанаар сэтгэл зүйн эрүүл мэнд зөв, тогтвортой байж, амьдралын чанараа дээшлүүлэх чадвар, мэдлэг нэмэх боломжтой. Түүнчлэн хөтөлбөрийн хэрэгжих хугацаа дууссан ч бидэнтэй холбоотой, хамтын ажиллагаатай байх үүд хаалга нээлттэй. Ажилтнуудынхаа мэдлэг ур чадвар, хувь хүний хөгжилд хөрөнгө оруулалт хийж, хамтран ажиллаж буй Эрдэнэт үйлдвэрийн Хүний нөөц, захиргааны хэлтсийнхэнд талархал илэрхийлье” гэсэн юм.
Нар минутад мандаж минутад жаргана.
Үс засуулвал: 
Суудал: 
