Эрдэнэт үйлдвэрийн уурхайчид төрөлх хотынхоо Төв цэнгэлдэх хүрээлэнд цуглаж, "Монгол наадам" үндэсний спортоо сурталчилж, наадлаа. Бороо хуртай, дэлгэр зуны бэлгэт сайн энэ өдөр "Эрдэнэт үйлдвэр" ТӨҮГ-ын Спорт цогцолбор, Залуучуудын холбоо хамтран "Монгол наадам" үндэсний спортоо сурталчлах өдөрлөг зохион байгуулж, энэхүү өв соёл, түүх уламжлал, бахархал бахдал дор уурхайчид нэгдэж, уухайлав.
"Монгол наадам"-ын үйл ажиллагааг “Эрдэнэт үйлдвэр” ТӨҮГ-ын Хамтын ажиллагаа, нийгмийн харилцааны газрын дарга Ц.Бат-Энх нээж, "Уурхайчид бид эрдэнэс ундрааж, баялаг бүтээхийн зэрэгцээ зуун зууныг өртөөлсөн буурал түүхтэй, дэлхийд ганцхан Монголынхоо сүр хүч, эв нэгдлийг илтгэн харуулж, үүх түүх, үнэт зүйлээ бэхжүүлэн, үр хойч үедээ өвлүүлэн үлдээж монгол уурхайчид, монгол түмнийхээ цог хийморийг бадрааж явахын утга учрыг тодотгов. Түүнчлэн энэ онд тохиож буй зууны манлай үйлдвэрийн түүхт 45 жилийн ойг угтсан ажлын нэг хэсэг нь энэхүү үндэсний спортоо сурталчлах өдөрлөг” гэдгийг онцолсон.
"Монгол наадам" өдөрлөгийн нээлтийн ажиллагаанд Орхон аймгийн Засаг дарга бөгөөд Эрдэнэт хотын захирагч С.Батжаргал оролцон, хотын иргэд, баялаг бүтээгчдэдээ мэндчилгээ дэвшүүллээ. Орхон аймаг, Эрдэнэт хот хоршин өргөжиж, хослон хөгжиж байгаагийн хамгийн гол үндэс нь уурхайчид, Эрдэнэтчүүдийн хүч хөдөлмөрийн үр шим гэдгийг Засаг дарга хэлсэн үгэндээ онцлон, баяр хүргэлээ.
Монголчуудын бахархалт өв соёлын төгс илэрхийлэл "Монгол наадам" үндэсний спортыг хөгжүүлэн бэхжүүлэхэд Эрдэнэт үйлдвэр нийгмийн хариуцлагын хүрээнд онцгой анхаарч, хөрөнгө оруулалт хийж, олон зуун алдартан, тамирчдыг төрүүлсэн бахархам түүхтэй. Үндэсний бөхийн энэ цаг үеийн цуутай аварга Б.Санжаадамба, О.Хангай тэргүүтэй олон арван хүчит бөхчүүд, Монгол Улсын Алдарт уяач Д.Жаргал, Д.Баясгалан, Манлай уяач Д.Дэлгэрбаяр нарын нэртэй уяачид, Дархан мэргэн Ш.Даваахүү, Гарамгай мэргэн Д.Дэмбэрэлсайхан нарын алдар цуутай мэргэн харваачид Эрдэнэт үйлдвэрээр овоглон, аугаа амжилтын эзэд болсон юм.
Тэдний амжилт ололт, алдар сууг "Монгол наадам"-ын хойморт алдаршуулж, үндэсний спортоо сурталчлах уурхайчдын өдөрлөг ийнхүү эхлэв. Энэ өдөр улс, аймгийн цолтой 32 шигшээ бөхийн барилдаан, жороо морины уралдаан, үндэсний сур, шагайн харваагаар наадаж, түрүү манлайгаа тодруулна.
Нар минутад мандаж минутад жаргана.
Үс засуулвал: 
Суудал: 
