Эрдэнэт үйлдвэрээс үйлдвэрлэлийн осол, хурц хордлого, мэргэжлээс шалтгаалах өвчлөлийн улмаас хувь тогтоолгосон ажилтнуудад 350 мянган төгрөгийн урамшуулал олголоо
Өнгөрсөн долоо хоногт Эрдэнэт үйлдвэрийн нийт ажилтнууд нэг сарын цалингийн дундажтай тэнцэхүйц нэг удаагийн мөнгөн урамшуулал авсан. “Ковид” цар тахлын хүнд үед Эрдэнэт үйлдвэр, улс орны санхүүгийн хямралыг бууруулах, айл өрх, аж ахуйн нэгжийн ус дулаан, цахилгааны төлбөрийг хариуцах МУ-ын Засгийн газрын үүрэг даалгаврыг амжилттай гүйцэтгэсэн тул тус үйлдвэрийн ажилтнуудын ажлын үр дүн, үүнд оруулсан хувь нэмрийг үнэлж, уг урамшууллыг олгосон юм. Мөн 5 дугаар сарын 22-нд болсон Эрдэнэт үйлдвэрийн 1000 Ахмадын чуулганы үеэр ахмад бүрд 350 мянган төгрөгийн урамшуулал олгосон бол үйлдвэрлэлийн осол, хурц хордлого, мэргэжлээс шалтгаалах өвчлөлийн улмаас хөдөлмөрийн чадвар алдалтын хувь тогтоолгосон ажилтнуудад мөн 350 мянган төгрөгийн урамшуулал олгохоор шийдвэрлэснийг удирдлагуудын өргөтгөсөн шуурхай дээр мэдээллээ. Урамшуулал олгох хүмүүсийн дийлэнх нь ахмадууд бөгөөд урамшууллыг үйлдвэрийн Ерөнхий захирлын тушаалын дагуу өчигдөр буюу 6 сарын 5-ны өдөр олголоо.
Оны эхний 5 сард үйлдвэрлэлийн үндсэн үзүүлэлтүүд 100 хувиар биеллээ
Эрдэнэт үйлдвэрийн уурхайчид оны эхний 5 сард үйлдвэрлэлийн төлөвлөгөөгөө 100 болон түүнээс дээш хувиар биелүүллээ. Тухайлбал оны эхний 5 сарын байдлаар, уулын цул гаргалт, хөрс хуулалт, хүдэр олборлолт, хүдэр боловсруулалт, өрөмдлөг зэрэг үйлдвэрлэлийн үндсэн үзүүлэлтүүд 100-108.9 хувиар биелсэн байна. Мөн энэ хугацаанд хүдэр дэх зэс, молибдены агуулга 101.3-109.1 хувь, металл авалтууд 100.9-113.7 хувь, баяжмал гаргалт 101.6-115.6 хувиар биелж, төлөвлөгөөнөөс илүү 4076,3 тонн зэсийн, 346,9 тонн молибдены баяжмалыг тус тус үйлдвэрлэсэн дүнтэй байна. Тэгвэл өнгөрсөн 5 дугаар сард Ил уурхайнхан 2527.0 мянган метр куб уулын цул гаргаж, 1161.36 мянган метр куб хөрс хуулалтын ажил гүйцэтгэж, төлөвлөгөөгөө 100.1-100.3 хувиар тус тус биелүүлж ажиллалаа. Түүнчлэн, төлөвлөгөөт 3537 мянган тонн хүдэр олборлож, 100 хувь биелүүлжээ. Баяжуулах үйлдвэрт 3281 мянган тонн хүдэр боловсруулж, хүдэр дэх зэсийн агуулга 0.420 хувь, молибдены агуулга 0.0140 хувьтай байсан нь төлөвлөгөөний биелэлтийг 101.4-117.6 хувьд хүргэжээ. Зэс, молибдены баяжмал гаргалтын төлөвлөгөө 100.9-101.1 хувиар, баяжмал дахь металлын төлөвлөгөө 101.6-107.7 хувиар тус тус биелсэн байна. Өнгөрсөн сард тус үйлдвэр нийт хуурай жингээр 52887.6 тонн зэсийн баяжмал, 525.1 тонн молибдены баяжмал экспортод ачуулж, ачигдсан баяжмалын чанарын үзүүлэлтийг 102-106 хувиар биелүүллээ.
Газар хөдлөлтийн үеийн аюулыг таниулах зарлан мэдээллийн сургуулилт болно
Монгол Улсын аюулгүй байдлын зөвлөл, Онцгой байдлын Ерөнхий газар, Нийслэлийн засаг даргын тамгын газар хамтран нийслэл, Орхон, Хөвсгөл, Сэлэнгэ, Дундговь зэрэг 7 аймагт газар хөдлөлтийн стратегийн команд штабын сургуулилтыг энэ сарын 7-9-ний өдрүүдэд зохион байгуулах гэж буйг ХАБЭА-н хэлтсээс мэдээлэв. Мөн энэ сарын 8 буюу Пүрэв гарагийн 16:00 цагт газар хөдлөлтийн аюулыг таниулах зарлан мэдээллийн сургуулилт болох бөгөөд Эрдэнэт үйлдвэрийн хэмжээнд зарлан мэдээллийн сургуулилтыг дараах зохион байгуулалтаар явуулах юм байна. Тухайлбал, Ерөнхий захиргааны I, I, III байрыг Аж ахуй, үйлчилгээний цехийн мэргэжлийн анги, бусад бүтцийн нэгжүүдийн зарлан мэдээллийн сургуулийг тухайн бүтцийн нэгжийн мэргэжлийн ангийн дарга, орлогч нар тус тус хариуцах юм. Түүнчлэн, газар хөдлөлтийн стратегийн команд штабын сургуулилтын ажлын хүрээнд шаардагдах мэдээ, мэдээллийг ХАБЭА-н хэлтсийн Гамшгаас хамгаалах штабын мэргэжилтэнд цаг тухайд шуурхай гаргаж өгч байхыг үйлдвэрийн газрын бүтцийн нэгжийн мэргэжлийн ангийн дарга нарт шуурхай зөвлөгөөн дээр анхаарууллаа.
Эрдэнэт үйлдвэрийн санхүүжилтээр хөдөө, орон нутгийн сургууль, цэцэрлэгийн нүхэн жорлонг орчин үеийн ариун цэврийн байгууламжаар солих төслийн явцын талаар танилцуулна
Боловсрол, шинжлэх ухааны яам хөдөө орон нутгийн сургууль, цэцэрлэг, дотуур байрны 853 нүхэн жорлонг орчин үеийн ариун цэврийн байгууламжаар солих төслийг хэрэгжүүлж байна. “Эрдэнэт үйлдвэр” ТӨҮГ нийгмийн хариуцлагын хүрээнд боловсролын салбарт хөрөнгө оруулалт хийж, энэхүү төслийг нийт 100 тэрбум төгрөгөөр санхүүжүүлж байгаа юм. Тэгвэл тус төслийн явцын тайлан, төсөв санхүүгийн зарцуулалтын талаар үйлдвэрийн удирдлагуудад танилцуулахаар БШУЯ-ны төлөөлөл Эрдэнэт үйлдвэрт ирсэн байна. Төсөл бүрэн хэрэгжсэнээр 18 аймгийн 267 сумын хүүхэд багачууд орчин үеийн стандартад нийцсэн ариун цэврийн байгууламжаар үйлчлүүлэх боломжтой болно. Сургууль, цэцэрлэгийн орчинд ариун цэврийн байгууламжийг ийнхүү шийдвэрлэснээр сурагчдын, тэр дундаа өсвөр насны охидын эрүүл мэндийг хамгаалах, халдварт өвчнөөс урьдчилан сэргийлэх, эрсдэлийг бууруулахад чухал нөлөө, өндөр ач холбогдолтой юм.