“Эрдэнэт медикал” эмнэлгийн шинжилгээний өндөр нарийвчлалтай оношилгооны компьютер томограф төхөөрөмж эвдэрч, засах боломжгүйгээс найман сарын турш зогссоныг Эрдэнэт үйлдвэрийн инженер техникийн мэргэжилтнүүд засаж өнгөрсөн долоо хоногт ашиглалтад орууллаа.
Hitachi брэндийн уг тоног төхөөрөмжийн өндөр давтамжийн генераторт томоохон гэмтэл гарч, гүйдэл хүчдэлийн тусгаарлагч алдагдсаныг Цахилгаан цехийн Шугам сүлжээ, дэд станцын хэсгийн инженер Б.Баяндүүрэн, мэргэжилтэн Александр Холоденко нар схем зургийг нь зурж, инженерийн өндөр мэдлэг, ур чадвар, туршлагаар "Эрдэнэт Медикал" эмнэлгийн инженерүүдтэй хамтран засварлажээ.
Мөн Засвар, механикийн завод энэхүү тоног төхөөрөмжид шаардлагатай резинэн эдлэлүүдийг үйлдвэрлэсэн байна. Үүний зураг схем, нарийн төвөгтэй хэв загвар, бэлдэц, бүтээгдэхүүнийг тэд өөрсдөө хийжээ. Япон улсад үйлдвэрлэсэн эмнэлгийн чухал тоног төхөөрөмжийг Эрдэнэт үйлдвэрийн инженерүүд ийнхүү дотоод нөөц бололцоогоо ашиглан засварласнаар 300 орчим сая төгрөгийн хэмнэлт гаргасан байна.
“Эрдэнэт медикал” эмнэлэг компьютер томограф шинжилгээгээр жилд олон зуун хүнд бүрэн оношилгоо хийдэг. Тус эмнэлгийн удирдлагууд Орхон аймгийн болон бүс нутгийн иргэдэд эрүүл мэндийн тусламж, үйлчилгээг чанартай, хүртээмжтэй үзүүлэх боломж нөхцөлөөр хангаж, эмнэлгийн чухал тоног төхөөрөмжийг засварлан, хүн ардын эрүүл мэндийг сахин хамгаалах үйлсэд үнэтэй хувь нэмэр оруулсан Эрдэнэт үйлдвэрийн монгол, орос инженерүүд болон "Эрдэнэт медикал" эмнэлгийнхээ инженер техникийн ажилтнуудад талархал илэрхийллээ.
Нар минутад мандаж минутад жаргана.
Үс засуулвал: 
Суудал: 
