“Энэрэл” төвийн хүүхдүүдээ баярлууллаа

     Дэлхийн өнцөг булан бүрд тэмдэглэдэг “Олон улсын хүүхдийн эрхийг хамгаалах өдөр”-ийг бид ч бас ирээдүй үе, хүүхдүүдийнхээ төлөө “ За” гэж хэлэх утга төгөлдөр өдөр болгохыг зорьдог хэмээн “Эрдэнэт үйлдвэр” ТӨҮГ-ын Ерөнхий захирал Г.Ёндон, “Энэрэл” төвийн хүүхдүүдтэй мэндчилэхдээ онцоллоо. Жил бүрийн 6 дугаар сарын 1-ний “Олон улсын хүүхдийн эрхийг хамгаалах өдөр”-ийг Эрдэнэт үйлдвэрийн удирдлагууд, тус үйлдвэрийн дэргэдэх “Энэрэл” төвийн хүүхдүүдтэйгээ хамт тэмдэглэн өнгөрүүлдэг. Өнөөдөр энэ уламжлал ёсоор Ерөнхий захирал Г.Ёндон, Хамтын ажиллагаа, нийгмийн харилцааны газрын дарга Ц.Бат-Энх, Хүний нөөц, захиргааны хэлтсийн дарга О.Отгонбаяр, Стратеги, хөгжлийн газрын дарга П.Энхбат болон холбогдох албаны хүмүүс “Энэрэл” төвд зочилж, төвийн хүүхэд багачуудтай баярын үйл ажиллагаанд оролцлоо. Жил жилийн хүүхдийн баяраа сурлага хөдөлмөр, урлаг спортын өндөр амжилт дүүрэн угтдаг “Энэрэл” төвийн хүүхдүүд энэ удаа ч олон уралдаан тэмцээний түрүү, шагналт байранд шалгарч, шилдгүүд болсноо үйлдвэрийн удирдлага, ах эгч нартаа ая дууны мэндчилгээтэй хамтатган тайлагнаж, үзүүлэв. Тэд, эрдэм номдоо шамдахын зэрэгцээ хүүхдийн төлөвшил, авьяас чадвараа нээн хөгжүүлэх, амьдрах ухаанд давхар суралцаж, өөрсдийн гараар урласан гоёл чимэглэл, лаан урлал, уран зураг зэрэг бүтээлээрээ үзэсгэлэн гаргаж, сонирхууллаа. 

     Энэ үеэр Ерөнхий захирал Г.Ёндон, “Эрдэнэт үйлдвэрийн 7000 орчим ажилтан бүгд өөр өөрийн гэр бүл, үр хүүхэдтэй хэдий ч “Энэрэл” төвд өсөж бойжиж, сурч хөгжиж буй бяцхан хүүхдүүд маань бидний гэр бүлийн нэг хэсэг гэж бодож явдаг. “Энэрэл” төвийг одоогоос 31 жилийн өмнө байгуулж, анхны хүүхдүүдээ тосон авч байсан бол эдүгээ тэд маань ажил амьдралын захад хүрч, өөрсдөө гэр бүл, үр хүүхэдтэй, улам олуулаа болжээ. Хүүхэд бүр инээмсэглэж, ирээдүй нь гэгээтэй байх ёстой. Үүнийг Эрдэнэт үйлдвэрт ажиллаж буй хүн бүхэн бодолдоо тээж явах ёстой. Түүнчлэн, Эрдэнэт үйлдвэр үр ашигтай ажиллаж, тэрхүү үр өгөөжийн тодорхой хэмжээний хуримтлалыг “Энэрэл” төвд өсөж буй хүүхдүүдийнхээ ирээдүйн сайн сайхны төлөө тасралтгүй зориулахын тулд хичээн зүтгэх учиртай. Эрдэнэт хэмээх өнөр бүлийн үр хойч нь болсон хүүхдүүд та бүхэндээ Олон улсын хүүхдийн эрхийг хамгаалах өдөр, Хүүхдийн баярын мэндийг уурхайчин ах эгч нарынх нь өмнөөс хүргэж, эрүүл энх өсөж торнин, эрдэм ном, авьяас билиг дүүрэн байж, эх орныхоо ирээдүйг хөтөлж явах зам харгуй нь гэрэлтэй байхын ерөөл дэвшүүлье” гэсэн юм.

     Баярын үйл ажиллагааны төгсгөлд үйлдвэрийн удирдлагууд хүүхдүүдэд баярын бэлэг гардуулж, сайн сурч, хөгжихийг хүссэн бол хүүхдүүд тэдэнд лаан урлалын бүтээлээсээ бэлэглэж, эрүүл энх, амгалан тайван өсөж бойжиж, суралцах бүхий л боломжоор ханган тусалдаг Эрдэнэт үйлдвэрийн бүх ажилтан, ах эгч нартаа баярлалаа хэмээн талархлаа илэрхийллээ.