“Самсунг Си энд Tи” корпорацын дэд ерөнхийлөгч Юн Хонг Сук төлөөлөгчдийн хамт Эрдэнэт үйлдвэрт зочиллоо

     Технологийн дэвшил, цахилгаан тоног төхөөрөмжийн үйлдвэрлэлээрээ дэлхийд тэргүүлэгч Солонгос улсын “Самсунг Си энд Tи” (Samsung C&T) корпорацын дэд ерөнхийлөгч Юн Хонг Сук (Yoon Hong Suk) тэргүүтэй тус корпорацын төлөөлөгчид өнөөдөр Эрдэнэт үйлдвэрт айлчиллаа. Төлөөлөгчид Ил уурхай, Баяжуулах үйлдвэрээр орж, уурхайн олборлолт болон хүдэр боловсруулалтын явц, үйл ажиллагаатай танилцав. Зочдыг “Эрдэнэт үйлдвэр” ТӨҮГ-ын Гадаад харилцаа, экспортын хэлтсийн дарга Я.Пүрвээ болон холбогдох албаны хүмүүс угтан авч, үйлдвэрлэлийн үйл ажиллагааг тайлбарлан, мэдээлэл өглөө.  

Эрдэнэт үйлдвэрт анхны айлчлалаа хийж буй “Самсунг Си энд Tи” корпорацын дэд ерөнхийлөгч Юн Хонг Сук, үйлдвэрлэлийн бүсэд ирэхэд хамгийн түрүүнд маш том бүтээн байгуулалт юм байна гэсэн бодол төрснөө энэ үеэр хуваалцсан. Тэрээр “Үйлдвэрлэлийн үйл явц маш нарийн горим, системтэй, түүний дагуу тасралтгүй ажиллаж байгааг харахад бахархалтай байна. Өмнө нь манай корпорацын удирдлагууд Эрдэнэт үйлдвэрт зочилж байсан. Биднийг ирэхэд үргэлж найрсаг угтан авдаг, олон жилийн хамтын ажиллагаатай, найдвартай түнш Эрдэнэт үйлдвэрийнхэндээ талархахын зэрэгцээ энэ удаагийн айлчлалаараа үйлдвэрлэл энд хэрхэн явагдаж буйг газар дээр нь үзэж, цаашдын хөгжлийн талаар ярилцаж, санал солилцох болсондоо их баяртай байна” гэж сэтгэгдлээ ярилаа. 

“Самсунг Си энд Tи” корпорацын төлөөлөгчид Эрдэнэт үйлдвэрийн ногоон бүтээн байгуулалт Ойн генетик нөөцийн “Эрдэнэт” төвтэй танилцаж, “Эрдэнэт-түүхэн замнал” музейг үзэж сонирхлоо. 

 Тус корпорацын дэд ерөнхийлөгчийн энэ удаагийн айлчлал нь түнш байгууллагынхаа үйлдвэрлэлийн талбар дээр өөрийн биеэр ирж танилцах, удирдлагуудтай уулзаж, санал бодол солилцох, улмаар Эрдэнэт үйлдвэр болон “Самсунг Си энд Tи” корпорац хоорондын хамтын ажиллагааг улам өргөжүүлж, хөгжүүлэх зорилготой юм.