Монгол Улсын Үндсэн хуульд оруулах өөрчлөлтийн төслийн гурав дахь хэлэлцүүлэгт бэлтгэх тухай УИХ-ын даргын 38 дугаар тогтоол гарсантай холбогдуулан хуульд оруулах өөрчлөлтийн төслийг Эрдэнэт үйлдвэрийн удирдлага, ажилтнуудад танилцууллаа.
УИХ-ын гишүүд тойрогтоо ажиллаж, иргэдэд танилцуулга хийж мэдээллээр ханган, санал бодлыг сонсох, санал авах ажлыг зохион байгуулах УИХ-ын захирамжийн дагуу танилцуулга, мэдээллийг УИХ-ын гишүүн Д.Батлут хийж, хуулийн өөрчлөлтийн төсөлтэй холбоотой асуултад хариулж, санал бодлоо солилцов.
Одоогийн хүчин төгөлдөр үйлчилж буй Монгол Улсын Үндсэн хуулийн 21 дүгээр зүйлд “Улсын Их Хурал нэг танхимтай, далан зургаан гишүүнтэй байна” гэж заасан байдаг. Харин Үндсэн хуульд өөрчлөлт оруулах төслийн хоёр дахь хэлэлцүүлгийн дараа энэ заалтыг “Монгол Улсын Их Хурал нэг танхимтай, 126 гишүүнтэй байх, Улсын Их Хурлын сонгуулийг олныг төлөөлөх болон хувь тэнцүүлэн хуваарилах тогтолцоогоор явуулах, 76 гишүүн нь олныг төлөөлөх, 50 гишүүн нь хувь тэнцүүлэх хуваарилах аргаар сонгох агуулгаар өөрчлөн найруулахаар УИХ-ын энэ сарын 19-ний өдрийн хуралдаанаар томьёолсон.
УИХ-ын гишүүдийн тоог 126 болгосноор УИХ-ын гишүүдийн төлөөлөх чадвар нэмэгдэнэ. Парламентын гишүүдийг холимог тогтолцоогоор сонгосноор “Улсын Их Хурлын гишүүн бол ард түмний элч мөн бөгөөд нийт иргэн, улсын ашиг сонирхлыг эрхэмлэн баримтална” гэсэн Үндсэн хуулийн заалт бүрэн хэрэгжинэ. Түүнчлэн хүн амын бүлгийг төлөөлөх чадвар нэмэгдэх, хуралдаан хүчинтэй байх ирц 64 болж нэмэгдсэнээр хууль эцэслэн батлагдах тул хуулийн чанарт эергээр нөлөөлөх, хяналт тэнцэл хангагдах зэргээр дээрх санал болгож буй хувилбарын эерэг үр дагаврыг тодорхойлж байгаа аж.
Үүнтэй холбогдуулан Эрдэнэт үйлдвэрийн удирдлагууд асуулт асууж, хуулийн өөрчлөлтийн төслийг дэмжих болон эс дэмжиж буй талаар санал бодлоо хэллээ. Тухайлбал, УИХ-ын гишүүдийн тоог нэмэх нь зүйтэй ч 126 биш 108 байх нь тохиромжтой, гишүүдийн тоог нэмэх шаардлагагүй, хэрэв нэмсэн бол нийгмийн бүх төлөөлөл, давхаргаас гишүүн сонгох боломж бүрдэх эсэх зэрэг тал бүрээс нь асууж, тодруулав. Төслийн танилцуулгын үеэр УИХ-ын гишүүн Д.Батлут 2023 онд батлагдсан хууль тогтоомж, эрх зүйн орчны талаар дэлгэрэнгүй мэдээлэл өгсөн юм.
Нар минутад мандаж минутад жаргана.
Үс засуулвал: 
Суудал: 
