МҮХАҮТ-д өнөөдөр “Төрийн өмчит компаниудын сэргэлт Эрдэнэс Монгол нэгдэл” чуулган болж, уг арга хэмжээнд “Эрдэнэт үйлдвэр” ТӨҮГ, “Эрдэнэс Тавантолгой” ХК, “Монголросцветмет”, “Эрдэнэс Оюу толгой” ХХК зэрэг 37 компанийн удирдах ажилтан болон инженер техникийн 400 ажилтан оролцож байна.
Монгол Улсын Засгийн газраас хэрэгжүүлж байгаа “Шинэ сэргэлтийн бодлого”-ын хүрээнд төрийн өмчит компаниудын менежментийг сайжруулах, сайн засаглалыг бэхжүүлэх, ашигт ажиллагааг сайжруулах, ил тод болгох хүрээнд хэрэгжүүлж буй ажлууд, цаашдын бодлого үйл ажиллагааны талаар Монгол Улсын сайд, ЗГХЭГ-ын дарга Д.Амарбаясгалан илтгэл тавилаа. Мөн нэгдлийн компаниудад сайн засаглалыг хэрэгжүүлэхэд шаардлагатай бодлого үйл ажиллагааны талаар “Эрдэнэс Монгол” ХХК-ийн ТУЗ-ийн дарга Ш.Мөнхцэрэн, Эрдэнэс Монгол нэгдлийн бүтэц, эдийн засагт үзүүлж буй үр нөлөө, хөгжлийн стратеги сэдвээр Гүйцэтгэх захирал С.Наранцогт нар чуулганд оролцогчдод тус тус мэдээлэл өгөв. Нэгдлийн хэмжээнд үйл ажиллагаагаа явуулж эхлээд дөрвөн сар болж байгаа “Эрдэнэс Монгол” ХХК-ийн харьяанд уул уурхайн салбарын 39 компанийн 19400 ажилтан, ажилчид хамрагдаж байна. Манай улсын хэмжээнд экспортын нийт орлогын 93 хувийг Эрдэнэс Монгол нэгдлийн харьяанд багтаж байгаа уул уурхайн дээрх компаниуд, үлдсэн 7 хувийг хувийн хэвшлийн аж ахуйн нэгжүүд бүрдүүлж байна. Дотор нь задалж авч үзвэл, 50 хувийг нүүрсний салбарынхан, 30 хувийг зэсийн салбарынхан бүрдүүлжээ.
Өнөөдрийн байдлаар Эрдэнэс Монгол нэгдлийн компаниуд “Алсын хараа-2050” Монгол Улсын урт хугацааны хөгжлийн бодлого, “Шинэ сэргэлтийн бодлого” дунд хугацааны бодлогын баримт бичиг болон Засгийн газрын үйл ажиллагааны хөтөлбөртэй уялдуулан 2022 оны төлөвлөгөөт арга хэмжээнүүдээ амжилттай хэрэгжүүлснийг нэгдлийн удирдлагууд илтгэлдээ онцлов.
Төрийн өмчит компаниудаас Монгол Улсын 2022 оны ТОП 10-аар Эрдэнэт үйлдвэр, Эрдэнэс таван толгой, Эрдэнэс Монгол нэрлэгдэж, “Гадаад валютын нөөцийг нэмэгдүүлэх чиглэлээр авах зарим арга хэмжээний тухай” Засгийн газрын 362 дугаар тогтоолыг нэгдлийн компаниуд амжилттай хэрэгжүүлж, “Эрдэнэс таван толгой” ХК 588.8 сая ам доллар, “Эрдэнэт үйлдвэр” ТӨҮГ 315 сая ам доллар, “Монголросцветмет” ТӨҮГ 20 сая ам доллар зэргийг тогтоосон хугацаанд Монголбанкинд төвлөрүүлсэн нь гадаад валютын улсын нөөцийг нэмэгдүүлэхэд онцгой үүрэгтэй байжээ. Түүнчлэн 2022 оны шилдэг татвар төлөгч байгууллагуудыг тэргүүлсэн Эрдэнэт үйлдвэр өнгөрсөн жил 36.1 сая тонн хүдэр олборлож, 33.6 сая хүдэр боловсруулан 3.6 их наяд төгрөгийн борлуулалт хийн, түүхэн дээд амжилт тогтоосныг мэдээллээ.
Засгийн газраас төрийн өмчит компаниудын засаглалыг сайжруулах, үр ашиг, орлогыг нэмэгдүүлэх хүрээнд “Эрдэнэс таван толгой” ХК-д онцгой дэглэм тогтоосноор нүүрсний экспортыг 2 дахин, нүүрс тээврийг 4 дахин нэмэгдүүлж, борлуулалтын орлогыг 500 сая ам.доллароор анх удаа өсгөж чаджээ. Эрдэнэс Монгол нэгдлийн харьяа компаниудын ажилтнууд маргааш АЖ ҮЙЛДВЭРЖИЛТИЙН ҮНДЭСНИЙ анхдугаар зөвлөгөөнд оролцоно. Монгол Улсын Ерөнхий сайд Л.Оюун-Эрдэнэ болон Монгол Улсын Шадар сайд Ч.Хүрэлбаатар, Уул уурхай, хүнд үйлдвэрийн сайд Ж.Ганбаатар нар Аж үйлдвэржилтийн сэргэлтийг дэмжих төрийн бодлогын талаар илтгэл тавина.
Нар минутад мандаж минутад жаргана.
Үс засуулвал: 
Суудал: 
