“Эрдэнэт-45” караоке дууны уралдааныг “Уурхайчин залуус” хамтлаг тэргүүллээ

Монгол Улсын Баатар “Эрдэнэт үйлдвэр” ТӨҮГ-ын 45 жилийн ойн хүрээнд “Соёл урлагаар дамжуулан нийгмийн сайн сайхныг хамтдаа бүтээцгээе” уриатай “Эрдэнэт-45” караоке дууны уралдаан амжилттай зохион байгуулагдаж, өчигдөр дүнгээ гаргалаа. Уралдаанд 15 хамтлагийн 75 дуучин оролцож, авьяас чадвараа сорьсноос Засвар, угсралтын цех, Оёдлын цехийн хамтарсан “Уурхайчин залуус” хамтлаг тэргүүлж, Аваргын цом, өргөмжлөл, гурван сая төгрөгөөр шагнууллаа. 

Автотээврийн цехийн “HOT MIC” хамтлаг дэд байр эзэлж, өргөмжлөл, нэг сая төгрөгөөр, “Эрдэнэт” сувиллын цогцолборын “Эгшиглэнт аялгуу” хамтлаг гутгаар байр эзлэн, өргөмжлөл, таван зуун мянган төгрөгөөр тус тус шагнууллаа. Хоёр үе шаттай явагдсан уг тэмцээний Ерөнхий шүүгчээр Соёл, урлагийн цогцолборын хөгжмийн удирдаач, Монгол Улсын Урлагийн гавьяат зүтгэлтэн, хөгжмийн зохиолч Б.Цэрэндондов, шүүгчээр 4-р сургуулийн дуу хөгжмийн багш, хөгжмийн зохиолч Д.Пүрэвсүрэн, Соёл, урлагийн цогцолборын найрал дууны багш Б.Нарантуяа, дуучин Б.Амартүвшин, С.Ариун-Эрдэнэ нар ажиллалаа. 

Тэмцээн 14 хоногийн турш үргэлжилсэн бөгөөд төгсгөлийн шатанд найман хамтлаг үлдэж, Хамтлаг дуу, Мэргэжлийн дуучинтай хамтарсан дуу, “Яг түүн шиг” үзүүлбэрээр өрсөлдсөн юм. Энэ үеэр тайзан дээр мотоцикл жолоодож, мөн амьд хөгжимтэй дуулсан зэрэг нь тэмцээнийг улам сонирхолтой, өрсөлдөөнтэй болголоо. Түүнчлэн танхимд хамтлагаа дэмжин уухайлсан, ижил өнгийн хувцсаар жигдэрсэн үзэгчид ч тэмцээний бас нэгэн чимэг болов. 
Мөн “Эрдэнэт үйлдвэр” ТӨҮГ-ын Хамтын ажиллагаа, нийгмийн харилцааны газрын дарга Ц.Бат-Энх ая дуугаа өргөснийг үзэгчид талархалтай хүлээж авлаа. Тэмцээний шүүгчид энэ удаагийн тэмцээн нээлттэй, Эрдэнэт үйлдвэрийн авьяастнуудаас гадна Орхон аймгийн байгууллага, иргэд оролцсоноор өргөн болж, уран сайханчдын бэлтгэл сайн, авьяас тунамал байсныг онцлов.