Эрдэнэт үйлдвэрийн 1000 ахмадын чуулган боллоо

     -Энэ сарын 22 буюу зуны тэргүүн сарын шинийн 3-нд “Эрдэнэт үйлдвэр” ТӨҮГ-ын 1000 ахмадын чуулган Хангарди паласт боллоо. Энэхүү 3 дахь удаагийн чуулганд Орхон аймгийн Засаг даргын орлогч А.Түвшинжаргал, “Эрдэнэт үйлдвэр” ТӨҮГ-ын Ерөнхий захирал Г.Ёндон болон газар, хэлтэс, цехийн удирдлагууд,үйлдвэрийн анхдагч, ахмадуудын төлөөлөл оролцов. Тус чуулганыг “Эрдэнэт үйлдвэр” ТӨҮГ-ын Ерөнхий захирал Г.Ёндон нээж хэлсэн үгэндээ: “Эрдэнэт үйлдвэрийнхээ хагас зуун жилийн түүхийг бүтээлцэж, Монгол Улсын ХХ зууны манлай бүтээн байгуулалтыг цогцлоосон Монгол Улсын Баатар Эрдэнэт үйлдвэрийн эрхэм анхдагчид, илгээлтийн эзэд, ахмадууд Та бүхнийхээ энэ өдрийн амгаланг айлтган мэндчилье! Түүхэн он жилүүдэд та бидний хөдөлмөр, зүтгэл зөвхөн Эрдэнэт үйлдвэр, Эрдэнэт хотын хөгжлөөр зогсохгүй Монгол Улсын хөгжил, нийгэм, эдийн засгийн амьдралд жинтэй хувь нэмэр оруулж ирсэн. Уул уурхайн үйлдвэрлэлийн оршин тогтнохын үндэс бол хүдрийн нөөц баялаг юм. Өнгөрсөн онд Монгол Улсын Засгийн газар “Эрдэнэт үйлдвэр” ТӨҮГ-т Эрдэнэтийн-Овоо стратегийн ордын нийт 99.5 мянган га талбайд ашигт малтмал хайх эрх бүхий зургаан тусгай зөвшөөрөл олгосон. Бид Эрдэнэтийн-Овоо ордын ойр орчимд шинээр орд нээх эхлэлийг тавьж, хүдрийн нөөцийг өсгөхийн тулд Оюут зэрэг ордод нарийвчилсан хайгуулыг эхлүүлсэн. Ингэснээр одоо тогтоогдоод буй нөөцөөр 60-70 жил ажиллах бололцоогоо нэмэгдүүлж, цаашдын ирээдүйгээ улам баталгаажуулах болно.Өнгөрсөн 2022 онд 33,6 сая тонн хүдэр боловсруулсан, 3,6 их наяд төгрөгийн борлуулалт хийсэн, улс, орон нутгийн төсөвт 1.8 их наяд төгрөг төвлөрүүлсэн нь Эрдэнэт үйлдвэрийн түүхэн дээд амжилт боллоо. Энэ нь Эрдэнэт үйлдвэр хоног тутам 3 сая ам.долларын бүтээгдэхүүн борлуулж, 5 тэрбум төгрөгийг улс, орон нутгийн төсөвт төвлөрүүлсэн гэсэн үг юм. “Эрдэнэт үйлдвэр” ТӨҮГ нь 2022 оныг “Их бүтээн байгуулалтын жил” болгон зарласан бол 2023 онд “Их бүтээн байгуулалтыг эрчимжүүлэх” зорилт дэвшүүлэн ажиллаж байна. Зорилтын хүрээнд үндсэн үйлдвэрлэлд шинэчлэл, өргөтгөл хийх, шинэ дэвшилтэт техник, технологи нэвтрүүлэх чиглэлээр урьд жилүүдэд эхлүүлсэн бүтээн байгуулалт, төслийн ажлуудыг эрчимжүүлэн ажиллаж байна. Үүний зэрэгцээ Үйлдвэрлэл, технологийн паркийн бүрэлдэхүүнд барих Зэсийн баяжмал хайлуулах, боловсруулах үйлдвэр, Исэлдсэн хүдрийг нуруулдан уусгах аргаар боловсруулах катодын зэсийн үйлдвэрийн техник, эдийн засгийн үндэслэл, нарийвчилсан зураг төслийг боловсруулж, барьж эхлэх бэлтгэл хангаж байна. Мөн Үйлдвэрлэл, технологийн паркийн эрчим хүч, усан хангамж, төмөр зам, авто зам бүхий дэд бүтцийг байгуулах ажил ид өрнөж байна. Эдгээр бүтээн байгуулалт, томоохон төслүүдийг хэрэгжүүлснээр Эрдэнэт үйлдвэр өртөг, зардлаа бууруулж, ашиг, орлогоо өсгөхийн зэрэгцээ нэмүү өртөг шингэсэн, үнэлэмж өндөртэй эцсийн бүтээгдэхүүн үйлдвэрлэж, дэлхийн зах зээлд өрсөлдөх чадвараа нэмэгдүүлэх болно. Эрдэнэт үйлдвэр нийгмийн хариуцлагын хүрээнд ажилтан, ахмад настан, үйлдвэрлэлийн осол, хурц хордлого, мэргэжлээс шалтгаалах өвчний улмаас хөдөлмөрийн чадвар алдалтын хувь тогтоолгосон ажилтнуудынхаа нийгмийн хамгаалал, нийгмийн баталгааг хангахад чиглэсэн олон талт үйл ажиллагааг нийгмийн чиглэлийн бүтцийн нэгжүүдээр дамжуулан хүргэж, нийт 24 төрлийн тэтгэмж, тусламж, дэмжлэг үзүүлэн ажиллаж байна. Анхдагч, ахмадуудынхаа үнэтэй үг сургаалыг сонсож, асран халамжлах нь Эрдэнэт үйлдвэрийн уурхайчдын хүлээх хүндтэй үүрэг, нийгмийн хариуцлага билээ. Иймээс бид залуу үеийг сургаж, хөгжүүлэхэд ахмадуудтайгаа нягт хамтарч, та бүхнийхээ эрүүл мэнд, нийгмийн хамгааллыг хангахад бүх талаар дэмжин ажиллах болно. Ахмадууд, анхдагчид, илгээлтийн эзэд Та бүхэндээ Эрдэнэт үйлдвэрийн 7000 гаруй ажилтны нэрийн өмнөөс болон хувиасаа, анхны хэлэлцээр байгуулагдсаны 50 жил, үйлдвэрийн үйл ажиллагаа эхэлсний 45 жилийн түүхт ойн баярын мэндийг хүргэж, эрүүл энх, аз жаргал, сайн сайхан бүхнийг хүсэн ерөөе. Сайн үйлс бүхэн дэлгэрэх болтугай” гэв. Мөн Эрдэнэт үйлдвэрийн Ахмадын нэгдсэн зөвлөлийн дарга Д.Байгал  мэдээлэл хийсэн юм. Тэрбээр: “Эрдэнэт  үйлдвэрийг байгуулах анхны хэлэлцээр байгуулагдсаны 50 жил, үйлдвэрийн эхний ээлж ашиглалтад орсны 45 жилийн ой энэ онд тохиож байна. Эдгээр ойн жилийн хүрээнд бид нийт ахмадууддаа Цагаан сараар мэндчилгээ дэвшүүлж, захидал бичсэн. Ахмадуудын сэтгэл зүй,үйлдвэртээ хандах хандлага, санал хүсэлтийг авах зорилгоор захидалтайгаа хавсаргасан судалгаа явуулсан. Үүний үр дүнд 2300 ахмадаас судалгааны материал ирсэн. Эндээс Эрдэнэт үйлдвэрээс тэтгэвэрт гарсан нийт ахмадуудын сэтгэл зүй ямар байна, юунд сэтгэл дундуур, хангалуун явдгийг  харж болно. Уг судалгааныхаа талаар үйлдвэрийн газрын Ерөнхий захирал болон түүний багийн удирдах зөвлөлд танилцуулсан. Ингэж ахмадуудад хандсан бодлого,зорилт, халамж үйлчилгээ,илүү дэвшилттэй болсноор орчин үеийн менежмент, аргачлалаар оновчтой хөгжинө гэдэгт итгэлтэй байна” хэмээн онцлов. Тус чуулганаар ахмад ажилтны туршлага, ажилд хандах хандлагыг ажилтнуудад өвлүүлэх, өндөр насны тэтгэвэрт гарахын өмнөх сэтгэл зүйн бэлтгэлийг хангах, ахмад мэргэжилтний санал санаачилгыг дэмжин ажиллахыг үүрэг болгож, үйлдвэрийн газрын ахмад тус бүрт 350000 төгрөгийн нэг удаагийн дэмжлэг олголоо. Мөн ахмадуудад ээлтэй цехээр  Б.Баасансүрэн даргатай Засвар механикийн завод шалгарав.Төгсгөлд нь чуулганд оролцогчид дурсгалын зураг татуулснаар Эрдэнэт үйлдвэрийн 1000 ахмадын уулзалт өндөрлөлөө.