Эрдэнэт үйлдвэрийн төв агуулахад гурваас дээш жил хадгалагдаж буй хөдөлгөөн багатай бараа материалуудыг ашиглах, борлуулах, үлдэгдлийг бууруулах зорилгоор “Нээлттэй хаалганы өдөрлөг”-ийг жил бүр зохион байгуулдаг уламжлалтай. Тээвэр, ложистикийн төв энэ жилийн өдөрлөгийг энэ сарын 22-ноос 26-ны өдрүүдэд зохион байгуулахаар төлөвлөн бэлтгэл ажилдаа оржээ. Одоогоор агуулахад гурваас дээш жил хадгалагдаж буй бараа материал, сэлбэг хэрэгслийг ангилж ялгах, буулгаж, дэлгэн байрлуулах ажил үргэлжилж байна. “Нээлттэй хаалганы өдөрлөг”-өөр үйлдвэрийн газрын бүтцийн нэгжийн инженер техникийн ажилтнууд, засварын ажлыг гардан гүйцэтгэдэг ажилтнуудад сэлбэг хэрэгсэл, бараа материалыг биетээр дэлгэн үзүүлж, газар дээр нь олгох ажлыг шуурхай зохион байгуулна гэж Агуулах аж ахуйн хэсгийн дарга Т.Амартүвшин ярилаа.
Эхний улирлын байдлаар төв агуулахад гурваас дээш жил хадгалагдаж буй 27 тэрбум төгрөгийн эргэлтийн хөрөнгө бүхий бараа материал байгаа нь нийт үлдэгдлийн 16 орчим хувийг эзэлж байна. Өнгөрсөн жилийн “Нээлттэй хаалганы өдөрлөг”-өөр таваас дээш жил хадгалагдаж буй сэлбэг хэрэгслийг дэлгэн борлуулсан бөгөөд энэ үеэр нийт 244 нэр төрлийн 834.5 сая төгрөгийн бараа материалыг Эрдэнэт үйлдвэрийн цех, нэгжүүдэд болон гаднын байгууллагад олгож ажиллажээ.