Эрдэнэт үйлдвэрийн Техникийн хэлтсээс 2024 оны үндсэн болон эргэлтийн хөрөнгө болох техник, тоног төхөөрөмж, эд анги, үндсэн технологийн материалын захиалга эхлэхтэй холбогдуулан бүтцийн нэгжүүдийн захиалгыг “Захиалгын нэгдсэн систем”-д оруулдаг ажилтнуудад өнөөдөр сургалт зохион байгууллаа. Энэхүү сургалт хэлэлцүүлэгт цехүүдийн захиалгад оролцдог 500 гаруй ажилтан хамрагдаж, худалдан авах үйл ажиллагаа амжилттай явагдахад анхаарах зүйл, шийдвэрлэх асуудлын талаар мэдээлэл авч, санал бодлоо хуваалцсан юм.
Техникийн хэлтэс 2017 оноос хойш цехүүдийн захиалгыг “Захиалгын нэгдсэн систем”-д төвлөрүүлэн авах болсон нь хүний оролцоог багасгах, ажил хөнгөвчлөх зэрэг олон давуу талыг бий болгосон. Захиалгын программ жилээс жилд сайжирч байгаа ч цаашид анхаарах хэд хэдэн асуудал байгааг мэргэжилтнүүд хэллээ. Тухайлбал, техникийн үзүүлэлт бүрэн, тодорхой байх, эргэлтийн хөрөнгийн нэршил оновчтой байх, хэмжигдэх нэгж ойлгомжтой байх хэрэгтэйг жишээгээр тайлбарлав. Ингэснээр тендер зарлахад ойлгомжгүй байдал үүсэхгүйн дээр худалдан авалт амжилттай болох нөхцөл бүрдэнэ. Анхан шатны захиалга хийж буй мэргэжилтнүүдийн ойлголт зөв байх нь худалдан авах ажиллагаа амжилттай болохын үндэс гэж Техникийн хэлтсийнхэн үзэж байгаагаа энэ үеэр илэрхийлсэн.
Одоогоор “Захиалгын нэгдсэн систем”-д бүртгэлтэй 180 мянга гаруй бараа материал байна. Үүнээс 64 мянган нэр төрлийн бараа нь идэвхтэй, бусад нь дээхэн үед захиалагдаж байсан, одоо ашиглагдахаа болсон бараа материал байна. Үүнийг тус хэлтсийн мэргэжилтнүүд нэгдсэн форматад оруулан цэгцэлж байгаа бөгөөд энэ ажил 60 орчим хувийн гүйцэтгэлтэй явна. Захиалгын программын сайжруулалт, өнөөдрийн сургалтаар ирэх оны захиалгын ажил ийнхүү эхэллээ.
Нар минутад мандаж минутад жаргана.
Үс засуулвал: 
Суудал: 
