Багш, шавийн гэрээ байгууллаа

     Эрдэнэт үйлдвэрийн Хүний нөөц, захиргааны хэлтсээс дөрөв дэх жилдээ хэрэгжүүлж буй Хүний нөөцийн хөгжлийн цогц хөтөлбөрийн хүрээнд “Багш, шавийн гэрээ байгуулах” үйл ажиллагаа өнөөдөр боллоо. Хүний нөөцийн хөгжлийн цогц хөтөлбөр нь “Шинэ ажилтны дасан зохицох”, “Манлайлал, авьяас чадвар”, “Залуу ажилтныг дэмжих”, “Залгамж” гэсэн дөрвөн чиглэлээр хэрэгждэг. Тэгвэл энэ онд шинээр ажилд орсон буюу “Шинэ ажилтны дасан зохицох” болон “Залгамж” хөтөлбөрт оролцогч ажилтнууд багш, шавийн гэрээ байгуулж, баталгаажууллаа.

     Тус үйл ажиллагаанд 2023 онд Эрдэнэт үйлдвэрт шинээр ажилд орсон 70 гаруй ажилтан, “Залгамж” хөтөлбөрийн оролцогчдын төлөөлөл хүрэлцэн ирж, Ил уурхайн Цахилгаан ба хийн гагнуурчин А.Гансэлэм, Авто тээврийн цехийн Уул уурхайн үйлдвэрлэлийн цооног цэнэглэх автомашины жолооч С.Лхагвасүрэн, Баяжуулах үйлдвэрийн Хөвүүлэн баяжуулагч Д.Ганзориг, Засвар, механикийн заводын Резинээр хуяглагч Б.Азжаргал, ДЦС-ын Дулааны төв пунктын машинч Б.Амарсайхан, Цахилгаан цехийн Тоног төхөөрөмжийн засварчин С.Мөнхсайхан, Аж ахуй, үйлчилгээний цехийн агуулахын эрхлэгч Д.Нарангэрэл, "Эрдэнэт цогцолбор" дээд сургуулийн Тэргүүлэх мэргэжилтэн Ч.Уранчимэг, 12-р цэцэрлэгийн туслах багш Х.Бурмаа нарын 17 багш, өөрсдийн шавь нартайгаа хамтын ажиллагааны гэрээ байгуулж, гарын үсэг зурав.

     Эрдэнэт үйлдвэрт олон жил үр бүтээлтэй ажиллаж, арвин дадлага туршлага хуримтлуулсан ахмад ажилтнуудын мэдлэг, ур чадварыг шинэ залуу ажилтнууд, хойч үеийнхэнд өвлүүлэн үлдээх зорилготой “Багш, шавийн гэрээ” нь байгууллагын залгамж чанар, соёлыг бэхжүүлэхэд өндөр ач холбогдолтой юм. Энэхүү гэрээний хүрээнд ажиллах багш, шавийг сонгохдоо ажил хөдөлмөртөө хандах хандлага, харилцааг олон талаас нь судалж, цехийн удирдлагатай нь санал солилцож, сонгон шалгаруулдаг. "Багш, шавийн гэрээ" нь амжилт туршлагаа шинэ шавьдаа өвлүүлэн үлдээх бахархал бол нөгөө талаасаа өндөр хариуцлага гэдгийг Хүний нөөц, захиргааны хэлтсийн дарга, Хүний нөөцийн хөгжлийн цогц хөтөлбөрийг санаачлагч О.Отгонбаяр тус үйл ажиллагааны үеэр онцолсон юм. Багш, шавийн гэрээ байгуулах үйл ажиллагааны дараа Эрдэнэт үйлдвэрт шинээр ажилд орсон Тээвэр, ложистикийн төвийн Ачаа вагон хүлээлцэгч Б.Эрдэнэбаяр, замчин Г.Энхбаяр, Ган бөөрөнцгийн цехийн Краны машинч Ж.Мөнхтуяа нарт “Шинэ ажилтны багц”-ыг гардуулж, зууны манлай үйлдвэрийн ирээдүйн түүхийг бичилцэх ажил үйлсэд нь өндөр амжилт хүсэн ерөөлөө.