Орхон аймгийн бизнесийн салбарт үйл ажиллагаа явуулдаг, бичил, жижиг дунд бизнес эрхлэгч эмэгтэйчүүдэд чиглэсэн “Өрхийн аж ахуйг хэрхэн оновчтой эрхлэх вэ” сургалт амжилттай боллоо. Сургалтыг Монголын Бизнес эрхлэгч Эмэгтэйчүүдийн холбооны Орхон аймаг дахь салбар болон аймгийн Засаг даргын тамгын газар хамтран зохион байгууллаа. “Эрдэнэт үйлдвэр” ТӨҮГ-ын Соёл, урлагийн цогцолборын бага танхимд зохиогдсон тус сургалтад бизнес эрхлэгч 200 орчим бүсгүй хамрагдаж, өнөө цагийн хөгжил дэвшилтэй хөл нийлүүлэх шинэ мэдлэг мэдээллээр оюуны “цангаагаа” тайлав.
Монголын Бизнес эрхлэгч Эмэгтэйчүүдийн холбооны Орхон аймаг дахь салбар нь гишүүнчлэлийн бүртгэлээ шинэчилж, үйл ажиллагаагаа идэвжүүлэхийн зэрэгцээ өрхөөс эхэлдэг бизнес загварыг орон нутагтаа хөгжүүлэх томоохон зорилт дэвшүүлжээ. Сургалтыг нээж Орхон аймгийн Засаг даргын орлогч А.Түвшинжаргал, УИХ-ын гишүүн Д.Батлутын Орхон аймаг дахь бие төлөөлөгч, хурандаа Г.Батсуурь нар үг хэлж, улс болоод аймаг, орон нутгийн бодлогын түвшинд бизнесийн салбарынхныг хэрхэн дэмжиж байгаа талаарх мэдээллийг хуваалцсан.
Хувь хүний хөгжил нь нийгмийн гол хөдөлгөгч хүч болдог тул бизнесийн салбарт үйл ажиллагаа явуулж буй жижиг дунд бизнес эрхлэгчдийг энэ өдөр сургалт, хэлэлцүүлэгт хамруулахаас гадна төр, бизнес, хувийн хэвшлийн салбарын эмэгтэй удирдах ажилтнуудад зориулсан сургалт явагдлаа. “Эмэгтэйчүүдийн ёс зүй нөлөөлөл хөгжлийн гарц болох нь” сэдэвт тус сургалтын сургагч багшаар зөвлөх үйлчилгээний “Имако институт”-ийн захирал Р.Лхагвадулам уригдан ажилласан юм.
Орхон аймгийн Засаг даргын тамгын газар болоод төрийн байгууллагын удирдлагууд бизнес эрхлэгчдийг дэмжсэн төсөл хөтөлбөр, үйл ажиллагаа, санхүүгийн боломжийг танилцуулж, хамтдаа хөгжих гарцыг эрэлхийллээ.
Нар минутад мандаж минутад жаргана.
Үс засуулвал: 
Суудал: 
