ОХУ-ын Санкт-Петербург хотноо урлагийн сургууль төгссөн хэсэг залуус эх орондоо цуглан “ПРО” театрыг байгуулжээ. Монголын “Отгон театр” хэмээн нэрлэгдсэн эдгээр залуусын эхний бүтээл “Эрхий мэргэн” жүжиг байсан бол хоёр дахь нь “Хүүхэлдэйн шоу” байсныг хэвлэлийн бага хурлын үеэр тэд онцоллоо. Харин сүүлийн хоёр сар гаруйн хугацаанд Улаанбаатар хотноо тоглогдсон “ПРО” театрын шинэхэн бүтээл нь “Инээмтгий хүн”. Залуу уран бүтээлчид Францын нэрт зохиолч Виктор Хюгогийн “Инээмтгий хүн” гурван боть зохиолыг тайзны бүтээл болгохоор шийдэж, жүжигчин Т.Энэрэл 124 хуудас бүхий зохиолыг бичиж дуусгажээ. Улмаар тухайн цаг үеийнхээ нийгмийн илэрхийлэл болсон “Инээмтгий хүн” зохиолыг тайзны бүтээл болгоход 40 гаруй уран бүтээлч хамтран ажилласан байна.
Нээлтээ хийснээс хойш 11000 гаруй хүнд хүрсэн уг жүжгийг Эрдэнэтийн унаган охин найруулж, тайзнаа “амилуулжээ”. Найруулагч Б.Даваасүрэн “Визуал театр гэдэг ойлголтыг үгээр бус үйлдлээр илэрхийлэгддэг урлаг” хэмээн нэгэнтээ тодорхойлсон. Театрын уран бүтээлчид энэ хаврын аялан тоглолтоо Эрдэнэтээр өндөрлөж, дараа дараагийн аймгуудад урилгаар тоглох боломжтойгоо илэрхийлсэн. Тэд театрын үзэгчийг багаас нь бэлтгэх зорилт тавин, нийт уран бүтээлийнхээ 70 хувийг хүүхэд багачуудад чиглүүлэхээр төлөвлөсөн байна. Мөн нийгмийн хариуцлагын хүрээнд шинээр тавигдаж байгаа тоглолт бүрдээ үзэгчийн суудлын нэг эгнээг хүүхдэд зориулахаар шийдвэрлэн, өнгөрсөн 12 дугаар сард Ид шидийн орны хүүхдүүдийг хамруулсан бол энэ удаагийн тоглолтод “Энэрэл” төвийн багачуудад урилга хүргүүлжээ. Хүүхэд багачуудад зориулсан хоёр ч уран бүтээлээ ойрын хугацаанд “өлгийдөн” авахаар ажиллаж байгаа талаар залуус сонордуулсан.
“Инээмтгий хүн” жүжиг 05 дугаар сарын 06, 07-ны амралтын өдрүүдэд 15:00, 20:00 цагаас Соёл, урлагийн цогцолборын их тайзнаа тоглогдож, Эрдэнэтчүүд та бүхний оюуныг мялаах нь ээ.
Нар минутад мандаж минутад жаргана.
Үс засуулвал: 
Суудал: 
