“Эрдэнэт үйлдвэр” ТӨҮГ-ын Ерөнхий захирал Г.Ёндон, ОХУ-ын анхны ерөнхийлөгч Б.Н.Ельцины нэрэмжит Уралын Холбооны Их сургуулийн захирал В.А.Кокшаров тэргүүтэй төлөөлөгчдийг 4 дүгээр сарын 29-нд Улаанбаатар хотод хүлээн авч уулзан хоёр байгууллагын хооронд тогтсон уламжлалт харилцааны талаар санал солилцож, цаашдын зорилтоо тодорхойлж, зарим чухал шийдвэрийг гаргалаа.
Үйлдвэрийн инженер техникийн ажилтан бэлтгэх, тэднийг сургаж, дадлагажуулах ажил Ш.Отгонбилэг агсан Монгол-Оросын хамтарсан “Эрдэнэт” үйлдвэрийн Ерөнхий захирлаар ажиллаж байх үеэс эхэлсэн бөгөөд одоо ч үргэлжилж байна. Тухайн үед энэ ажлыг эхлүүлэхэд Уралын мэргэжил дээшлүүлэх дээд сургуулийн захирал Г.Э.Бурбулис (хожим нь ЗХУ-ын Сайд нарын Зөвлөлийн 1-р орлогч дарга болсон) их үүрэг гүйцэтгэснийг энэ дашрамд дурдъя. “Эрдэнэт үйлдвэр” ТӨҮГ, Уралын Холбооны Их сургууль хоорондын хамтын ажиллагаа, харилцан ойлголцлын мемарандум (дипломат гэрээ) 2015 онд байгуулагдсан бөгөөд түүнээс хойш 2017, 2022 онд шинэчлэгджээ.
Энэ удаагийн уулзалтаар Эрдэнэт үйлдвэрийн зарим чухал мэргэжил, тухайлбал Өнгөт металлургийн чиглэлээр инженер техникийн боловсон хүчнийг төлөвлөгөөтэй бэлтгэх, 2023-2024 оны хичээлийн жилд урьдын адил бакалавр, магистрт элсэлт авах, Эрдэм шинжилгээ, судалгааны салбарт хамтран ажиллах талаар хэлэлцэн тохирлоо. Мөн энэ жилээс эхлэн “Эрдэнэт цогцолбор” дээд сургуулиас 11 оюутныг Өнгөт металлурги мэргэжлээр хамтарсан боловсролын (2+2) программд хамруулан суралцуулж, хоёр улсын диплом олгох шийдэлд хүрсэн нь уулзалтын онцлох үр дүн байлаа.
Ийнхүү, хоёр байгууллагын хооронд хамтран ажиллах талаар тохирсон зүйлүүд нь “Эрдэнэт үйлдвэр” ТӨҮГ-ын хөгжилд бодит хувь нэмэр оруулж, үйлдвэрлэлийн үр ашгийг дээшлүүлэхэд чухал түлхэц өгөх нь дамжиггүй юм.
Уралын Холбооны Их сургуулийн бие төлөөлөгч,
доктор, профессор Б.Мянганбаяр
Нар минутад мандаж минутад жаргана.
Үс засуулвал: 
Суудал: 
