Хамтарсан бүтээлд оюуны өмчийн эрх авна

      “Эрдэнэт үйлдвэр” ТӨҮГ-ын Оюуны бодлого, түүний хэрэгжүүлэх журмууд 2015 онд батлагдсан. Үүнээс хойш нийт 16 бүтээлд Эрдэнэт үйлдвэрийн эзэмшлийн оюуны өмчийн эрхийн хамгаалалт хийгджээ. Үүнд шинэ бүтээлийн патент гурав, ашигтай загварын патент нэг, үндсэн болон туслах 12 барааны тэмдэгт оюуны эрхийн хамгаалалт хийлгэсэн байна. Энэ онд дөрвөн бүтээлд оюуны эрхийн хамгаалалт хийлгэх аж. Тухайлбал, ШУА, Ус хангамжийн цех хамтран “Цэвэрлэх байгууламжийн хуримтлагдсан лагийг боловсруулж шимт хөрс бэлтгэх” төсөл дөрвөн жилийн хугацаанд амжилттай хэрэгжсэн. Уг төслийн үр дүнд бий болсон шинэ технологийг оюуны өмчид мэдүүлэх бэлтгэл ажил хийгдэж байна. Манай улсын хэмжээнд шувууны цангис, хонины ноос, чийгийн улаан хорхойгоор сайжруулсан хөрс буюу шимт бордоо бэлтгэж зах зээл дээр борлуулдаг. Харин Эрдэнэт үйлдвэр, Цэвэрлэх байгууламжийн хуримтлагдсан лагийг боловсруулан шимт хөрс бэлтгэж, улсын хэмжээнд анхны технологийн шинэ шийдэл гаргажээ. Эрдэнэт хот байгуулагдсан цагаас 30000м3 лаг хуримтлагдсан байдаг. Энэхүү хуримтлагдсан лагийг боловсруулан 5500-6000м3 сайжруулсан хөрс бэлтгэн гаргажээ. Үүний 70 хувийг 2022-2023 оны хаврын мод тариалалтад Ногоон хөгжил төслийн нэгж авч ашигласан аж. Үлдсэн 30 хувь нь технологийн боловсруулалт хийгдэж байна. Энэ талаар Стратеги, хөгжлийн газрын Инноваци, оюуны өмч хариуцсан мэргэжилтэн Д.Энхтунгалаг: “Энэ жилийн эрхийн хамгаалалт хийлгэх бүтээлийн онцлог нь нэгдүгээрт, оюуны өмчийг зорилтот зах зээлд эдийн засгийн эргэлтэд оруулахаар төлөвлөсөн. Хоёрдугаарт, анх удаагаа хамтарсан оюуны өмч мэдүүлэхээр техник зохион байгуулалтын ажил хийгдэж байна. Эрдэнэт үйлдвэр, ШУА-тай тав дахь жилдээ хамтран ажиллаж байгаа. Тус академийн эрдэмтдийн оюуны өмчтэй хамааралтай технологийн шинэ шийдэл гарсан учраас хамтарсан оюуны өмч бий болно. Стратеги, хөгжлийн газраас тухайн бүтээл үүссэн бүтцийн нэгж дээр Эрдэнэт үйлдвэрийн оюуны өмчийн бодлого, түүний хэрэгжүүлэх журмуудын талаар семинар хийж, тодорхой мэргэжил, арга зүйн зөвлөгөө өглөө” гэв.