“Эрдэнэт үйлдвэр” ТӨҮГ-ын Ногоон хөгжил төслийн нэгжээс санаачилсан “SEED EXPO week-2023” үзэсгэлэн яармаг өчигдөр Ойн генетик нөөцийн “Эрдэнэт” төвд эхэллээ. Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд ойн салбарын 100 жилийн ойг угтаж, модлог ургамлын үрийн худалдаа, солилцоог зохион байгуулж, үрийн мэдлэг олгох, мэдээлэл түгээх, иргэдийн мод тарих, ургуулах хүсэл сонирхлыг идэвхжүүлэх зорилгоор энэхүү үзэсгэлэнг зохион байгуулж байна. Энэхүү үйл ажиллагаанд мод, цэцэг ургамлын үрсэлгээ, гадна доторх тохижилт хийдэг мэргэжлийн байгууллагууд Улаанбаатар хот, Дархан-Уул, Орхон аймгаас оролцож, худалдаа арилжаа хийхийн зэрэгцээ, хэрхэн тарьж ургуулах талаар иргэдэд зөвлөгөө зөвлөмж өгч байна. Үзэсгэлэнгийн эхний өдөр мод, цэцэг тарьж ургуулах сонирхолтой иргэдээс гадна Баяжуулах үйлдвэрийн ажилтнууд ирж, сонирхлоо.
Үзэсгэлэнгийн үйл ажиллагааг нээж, “Эрдэнэт үйлдвэр” ТӨҮГ-ын Ерөнхий захирал Г.Ёндон хэлсэн үгэндээ: “Эрдэнэт үйлдвэр Эрдэнэтийн-Овоо ордыг ашиглаж, 7000 гаруй хүнийг ажлын байраар хангаж, улс орны эдийн засагт томоохон үүрэг хүлээж ажилладаг. Үүний зэрэгцээ дэлхийн уур амьсгалын өөрчлөлтийн нөлөөллийг бууруулах, ой, усны нөөцийг хамгаалж нэмэгдүүлэх, экологийн тэнцвэрт байдлыг хангахад чухал ач холбогдолтой “Тэрбум мод” үндэсний хөдөлгөөнд манлайлан оролцож, 100 сая мод тарьж ургуулах зорилт тавьсан юм. Энэ зорилтын хүрээнд модлог ургамлын үрийн нөөц бүрдүүлэх, генийн санг хадгалах, хамгаалах ойн нөөцийг эдийн засгийн эргэлтэд оруулах зорилгоор өнгөрсөн зун Ойн генетик нөөцийн “Эрдэнэт” төвийг ашиглалтад оруулсан. Энэ нь Эрдэнэт үйлдвэр ухдагаас гадна ургуулдаг болох томоохон зорилтын илрэл юм. Энэ хүрээнд олон үйл ажиллагаа зохион байгуулж буйн нэг нь өнөөдрийн экспо юм. Бид үүнийг жилд хоёр удаа зохион байгуулах уламжлалт ажил болгохоор зорьж байна” гэв.
Долоо хоногийн турш үргэлжлэх үзэсгэлэн яармагийн эхний өдрийнх “Хаан-хайлаас мод” сэдэвтэй байв. Хайлаас модны ач холбогдлын талаар мэргэжлийн хүн тайлбарлав. Нэг хайлаас 23 кг нүүрс хүчлийн хийг шингээж авдаг. Ургах орчин, арчилгаа бага шаарддагаас гадна хамгаалах зурвас болдог ач холбогдолтой аж. Эрдэнэт үйлдвэрийн Хаягдлын аж ахуйд өнгөрсөн жил 2,1 сая хайлаас тарьсан нь боломжийн ургаж байгаа тухай ярив. Энэ үеэр үрээр мод тарих, мөчир бортоголох үзүүлэх сургалт хийсэн нь сонирхолтой байлаа. Түүнчлэн оролцогчид үзэсгэлэнгээс худалдан авалт хийхийн зэрэгцээ урлагийн тоглолт сонирхож, чөлөөт цагаа үр дүнтэй, сонирхолтой өнгөрүүлэв.
Нар минутад мандаж минутад жаргана.
Үс засуулвал: 
Суудал: 
