“Эрдэнэт үйлдвэр” ТӨҮГ-ын Ерөнхий захирлын тушаалаар байгуулагдсан “Найрамдлын Эрдэнэс” хүүхдийн зуслангийн 2023 оны зуны үйл ажиллагааг эхлүүлэх бэлтгэл хангах ажлын хэсэг хуралдлаа. Хурлыг ажлын хэсгийн ахлагч, Хамтын ажиллагаа, нийгмийн харилцааны газрын дарга Ц.Бат-Энх удирдаж, хүүхдийн зуслангийн эхний ээлжийн өмнө цаг алдалгүй хийх шаардлагатай ажлууд, тэдгээрийг тойрсон хэд хэдэн чухал асуудлыг хэлэлцэв. Хуралд ажлын хэсгийн гишүүд болон Хялганатын чиглэлийн авто замын өргөтгөл засвар, шинэтгэлийг гүйцэтгэгч компанийн төлөөлөлтэй өргөн бүрэлдэхүүн оролцож, “Найрамдлын Эрдэнэс” хүүхдийн зуслангийн зуны үйл ажиллагааны өмнө бэлэн болгох ажлуудаа ярилцав.
Эдгээр асуудлуудаас хамгийн чухал бөгөөд анхаарал татаж буй "Сэлэнгэ" амралтын бааз хүрэх, улмаар Хангал, Хялганатын чиглэлд зорчих зам засвар, шинэтгэлийн ажлыг шуурхайлах, чанартай хийж гүйцэтгэхийг онцолсон. Учир нь энэ замаар хүүхэд тээвэрлэсэн автобусны урт цуваа явах хугацаа ойртсон тул одоо хааж, буулгасан байгаа гүүр, зам орчмын эрэг даланг яаралтай засаж, аюулгүй болгох шаардлагатай. Мөн гүйцэтгэгч компаниуд ажлаа хугацаанд нь чанартай дуусгах, ард иргэдийн аюулгүй зорчих боломжийг бүрдүүлэхэд анхаарах, зам засварын ажил хийгдэж буй талбай, эргэн тойронд тэмдэг тэмдэглэгээ, анхааруулга самбарыг стандартын дагуу байрлуулах гэх зэрэг үүрэг даалгавар, чиглэлийг ажлын хэсгийн ахлагч онцгойлон өгөв. Түүнчлэн хүүхдийн зуслангийн үйл ажиллагааг сайжруулах, амрагч хүүхдүүдийн тав тух, урам зоригийг дээшлүүлэх үүднээс дотоод засвар үйлчилгээг чанарын өндөр түвшинд хийх, ялангуяа бие засах болон халуун усны өрөөг стандартын дагуу тохижуулж, гүйцэтгэхийг Барилга засварын цех болон “Сэлэнгэ” амралт, аялал жуулчлалын цогцолборын удирдлага, хариуцсан мэргэжилтнүүдэд үүрэг болголоо.
“Найрамдлын Эрдэнэс" зусланд хүрэх буюу Эрдэнэт-Хялганатын чиглэлийн авто замын гурван багц засвар шинэтгэлийн ажлыг “Замын битум”, “Хурдны зам”, “Жавхлант харгуй” компаниуд гүйцэтгэж байна. Уг бүтээн байгуулалтын ажил Эрдэнэт үйлдвэрийн хөрөнгө оруулалтаар хийгдэж байгаа бөгөөд захиалагчийн хувьд цаг хугацаа болоод чанарын өндөр гүйцэтгэлийг шаардана гэдгийг Ажлын хэсгийн ахлагч авто замын ажилтай биечлэн танилцахдаа онцолсон юм. Өөрөөр хэлбэл, энэ бүх бэлтгэл ажлыг ирэх сарын 25 гэхэд дуусгаж, бэлэн болгох тодорхой чиглэл өглөө.
“RCS” Замын зөвлөх компанийн багийн ахлагч О.Пүлжин: Долоо хоногийн дотор түр замын асуудлыг шийднэ
Зам барилгын ажлын гүйцэтгэгч компаниуд энэ сарын 13-наас ажиллаж эхэлсэн. Энэхүү замын ажлын эхний багц буюу Эрдэнэтийн гурван замын уулзвараас Хангал сум хүртэлх 30 км замыг “Замын битум” компани, хоёр дахь багц буюу Хялганатын гүүр хүртэлх 23.6 км замыг “Хурдны зам”, "Сэлэнгэ" амралтын бааз, 1,2 -р подъём, цэвэрлэх байгууламж чиглэлийн нийт 10.4 км замыг “Жавхлан харгуй” компани тус тус гүйцэтгэж байна. Энэ жил цаг агаар хүйтэн, ус шавар ихтэй байгаагаас төв зам руу явах даланг түр хаасан. Ойрын хугацаанд буюу долоо хоногийн дотор бид түр замын асуудлыг шийдэж, тэмдэг тэмдэглэгээг байршуулж, засварлаад орон нутгийн зорчих хөдөлгөөнийг хэвийн болгоно гэж төлөвлөж байна.
“Сэлэнгэ” амралтын баазын дарга Д.Эрдэнэбат: Дотоод нөөц бололцоогоо ашиглан хүүхдийн зуслангийн үйл ажиллагааг эхлүүлэх бэлтгэл хангаж байна
Хамтын ажиллагаа, нийгмийн харилцааны газрын даргын үүргийн дагуу “Сэлэнгэ” амралт, аялал жуулчлалын цогцолбор ажлын хэсэг байгуулаад ажиллаж байна. Бид ажлын төлөвлөгөөндөө бараа материалын хангамж, зуслангийн байрны тохижилт, хангалт, засвар тохижилтыг дотоод нөөц боломжоо ашиглан хийхээр тусгаж, бэлтгэл хангаж байна. Бусад асуудлыг чиглэл хариуцсан удирдлагуудын түвшинд шийдүүлэхээр саналаа хүргүүлсэн. Нөгөө талаар, бэлтгэл ажлын хүрээнд Хялганат чиглэлийн авто замын засварын ажил орж байгаа. Энэ замаар манай Сэлэнгэ амралтын баазын ажилтнууд өдөр бүр зорчиж, ажилдаа ирж очдог. Мөн зуслан эхлэхээр 500 гаруй хүүхэд 20 гаруй автобусаар зорчино. Тийм учир манай зүгээс энэ асуудалд нэлээд хариуцлагатай оролцож байгаа. Ажлын хэсгийн ахлагч ч өндөр ач холбогдол өгч, аюулгүй байдлыг хангах үүрэг даалгавар өглөө. Гүйцэтгэгч тал болон ажил хариуцсан хүмүүс энэ асуудалд нухацтай хандаж, хамтран ажиллана гэж найдаж байна.
“Хурдны зам” компанийн Ерөнхий инженер Д.Эрдэнэбаатар: Бид баяр наадмын өмнө ажлаа дуусгахаар төлөвлөсөн
Манай компанийн гүйцэтгэж буй 23.6 км замын ажил одоогоор 35 хувийн гүйцэтгэлтэй байна. Засвар шинэтгэлийн ажил учраас үндсэн ажлын обьёом нь суурь, асфалт хучилтын ажил. Эдгээр ажлын гүйцэтгэл 80-90 хувьд хүрсэн. Тэгэхээр бид баяр наадмын өмнө буюу 7 сарын эхээр дуусгана гэсэн төлөвлөгөөтэй байна. Бид өнгөрсөн жилийн төлөвлөгөөний дагуу түр замаа гаргасан. Одоо энэ зам дээрээ тэмдэг тэмдэглэгээг стандартын дагуу гүйцээн байршуулж, замын хөдөлгөөнийг аюулгүй байдлыг бүрэн хангах зорилготой ажиллаж байна.
Нар минутад мандаж минутад жаргана.
Үс засуулвал: 
Суудал: 
