Эрдэнэт үйлдвэрийн хөрөнгө оруулалтаар баригдаж буй соёл, спортын “Эрдэнэт” цогцолборыг ирэх 12 сарын 01-нд дуусгаж, ашиглалтад оруулах үүрэг чиглэлийг Хамтын ажиллагаа, нийгмийн харилцааны газрын дарга Ц.Бат-Энх тус цогцолборын Ашиглалтын өмнөх захиргаанд өглөө. Тэрээр өнөөдөр соёл, спортын цогцолборын бүтээн байгуулалттай холбогдох бүхий л газар хэлтэс, цех нэгжийн удирдлага, мэргэжилтнүүдийг газар дээр нь байлцуулан, барилга байгууламжийн ажлын явцтай биечлэн танилцав. Энэ үеэр “Эрдэнэт” цогцолборын барилгын ажлын гол гүйцэтгэгчээр ажиллаж буй Барилга засварын цехийн мэдээллийг сонсож, санал солилцлоо. Мөн олон жил дамнаж, удааширсан уг барилгын ажилд одоогийн байдлаар тулгамдаж буй хүндрэл бэрхшээл, шийдэл гарцыг олон талаас нь авч хэлэлцэж, гүйцэтгэлийн явцыг цаг алдалгүй шуурхайлж, эрчимжүүлэхийг ажил хариуцсан хүмүүст анхааруулав.
Соёл спортын бүхий л үзвэр, үйлчилгээг нэг дор нэгтгэж, орчин үеийн шинэ технологи, өвөрмөц хийц, гадаад дотоод тохижилттой байхаар төлөвлөгдсөн соёл, спортын “Эрдэнэт”цогцолбор нь 18 мянган метр куб багтаамж бүхий танхим, агч модон шал, үзэгчдийн тусгай суудал, харилцаа холбоо, аюулгүй найдвартай байдлыг хангах зэрэг олон өвөрмөц шинэлэг шийдэл, стандарттай баригдах юм. Харин энэ бүх ажлыг чанарын өндөр түвшинд, үйлчилгээний стандартад бүрэн нийцүүлэн хийж гүйцэтгэж, энэ оны 12 сарын эхэнд ашиглалтад бэлэн болгох нь чухал гэдгийг энэ үеэр онцоллоо. Өнөөдрийн байдлаар, соёл спортын “Эрдэнэт” цогцолборын барилгын гүйцэтгэл 40 хувьтай байна. Цаг агаарын байдлаас шалтгаалан гадаад тохижилтын ажил хүлээгдэж байгаа бол дотоод засал чимэглэл, доторлогоо эрчимтэй үргэлжилж буйг Барилга засварын цехийн Ерөнхий инженер Ж.Батсуурь танилцууллаа. 5 сард тус цехийн нийт ажилтны 70 хувь хүч нэмэгдүүлэн ажилласнаар ирэх 9 сарын эхээр гол ажлууд дуусах төлөвлөгөөтэй байгаа аж.
Нар минутад мандаж минутад жаргана.
Үс засуулвал: 
Суудал: 
