“iEco” цэвэр усны дээжийг мэргэжлийн лабораторид шинжлүүлж байна

      ХАБЭАХ-ийн Эрүүл ахуйн товчоо уурхайчдын эрүүл мэндийг дэмжих, ажлын байрнаас үүсэх сөрөг хүчин зүйлсийн үйлчлэлээс ажилтнуудыг хамгаалах, мэргэжлээс шалтгаалах өвчлөлөөс урьдчилан сэргийлэхэд чиглэсэн төлөвлөгөөт ажлуудыг тогтмол хэрэгжүүлж байна. Тус товчооныхон ажлын байрны орчин нөхцөл болон ундны ус, хор саармагжуулах бүтээгдэхүүнд төлөвлөгөөт хяналт шалгалтыг тогтмол хийж, зөрчил дутагдлыг шийдвэрлэн ажилладаг. Тухайлбал, өнгөрсөн долоо хоногт “Ранчо” ХХК-ийн 0,5 литрээр савлагдсан “iEco” цэвэр усны үнэр, амт өөрчлөгдсөн талаар ажилтнаас ирүүлсэн гомдол саналыг хүлээн авч ажиллажээ. Ингэхдээ үйлдвэрлэгч, нийлүүлэгч компанитай зөвшилцөн, түгээлтэд гаргасан 3000 ширхэг усыг эргүүлэн татсан байна.
     Цэвэр ус үйлдвэрлэгч компаниудад 10 жил тутамд тоног төхөөрөмжийн шинэчлэл хийх стандарт шаардлага тавигддаг байна. Уг шаардлагын дагуу 2013 онд байгуулагдсан “iEco” цэвэр усны үйлдвэр шат дараатай шинэчлэлийн хүрээнд өнгөрсөн сарын 28, 29-ний өдрүүдэд тоног төхөөрөмж суурилуулах ажлыг хийжээ. Ингэхдээ тоног төхөөрөмжийн жигдрэх хугацаанд ойлголцол дутуу байснаас гадна горим тохируулгын алдаанаас үүдэлтэй савласан усны үнэр, амт өөрчлөгдсөн болохыг тогтоож, гуравдугаар сарын 30-ны өдөр савласан усыг эргүүлэн татжээ. Тус компанийн зүгээс “Эрдэнэт үйлдвэрээс эргүүлэн татсан усыг холбогдох байгууллагын шинжилгээнд өгсөн, албаны ёсны дүгнэлт хүлээж байна” гэв.
      “Эрдэнэт үйлдвэр” ТӨҮГ нь “Төрийн өмчийн хөрөнгөөр бараа, ажил, үйлчилгээ худалдан авах тухай хууль”-ийг хэрэгжүүлэн, бараа материалын худалдан авалтыг тендер шалгаруулалтын журмаар шийдвэрлэн ажиллаж байна. Өнөөдрийн байдлаар Эрдэнэт үйлдвэрийн ХАБЭАХ нь 0,5 литрээр савласан “Ранчо” ХХК-ийн уснаас сард 60 гаруй мянга, “Хужирт” эрдэслэг уснаас 20 орчим мянган ширхгийг гэрээний дагуу хүлээн авч, уурхайчдыг цэвэр усаар ханган ажиллаж байна.