Улаанбаатар төмөр замын хүний нөөцийн мэргэжилтнүүд Эрдэнэт үйлдвэрээс туршлага судаллаа

      Улаанбаатар төмөр зам хувь нийлүүлсэн нийгэмлэгийн хүний нөөцийн бодлогын баримт бичгийг шинэчлэх ажлыг гардан хэрэгжүүлж буй мэргэжилтнүүд өнөөдөр “Эрдэнэт үйлдвэр” ТӨҮГ-ын сайн туршлагаас суралцлаа. Хөгжлийн 45 жилийн түүхэн замналтай Эрдэнэт үйлдвэрийн Хүний нөөц, захиргааны хэлтсийн дарга О.Отгонбаяр үйлдвэрийн газрынхаа алсын хараа, эрхэм зорилго, тогтвортой хөгжлийн бодлого, тэр дундаа хүний нөөцийн бодлого, засаглал, хөгжлийн цогц хөтөлбөр, “Хүний нөөцийн менежментийн тогтолцоо ISO 30400” багц стандартыг нутагшуулахад тулгарсан бэрхшээл, хэрэгжүүлэхэд бий болсон эерэг өөрчлөлт, үр дүн, ач холбогдлын талаар дэлгэрэнгүй танилцуулж нээлттэй мэдээлэл хийсэн юм. 

        Эрдэнэт үйлдвэр үндэсний баялаг бүтээхээс гадна уул уурхайн мэргэжилтэй боловсон хүчин бэлтгэж ирсэн их уурхай юм. Өнгөрсөн хугацаанд зууны манлай үйлдвэр давхардсан тоогоор 62726 хүнд 87 төрлийн мэргэжил эзэмшүүлсэн бөгөөд есөн хөтөлбөрөөр 2365 хүнийг бакалаврын болон дипломын инженер мэргэжлээр бэлтгэн гаргаад байна. Түүнээс гадна хүний нөөцийн бодлогыг үйлдвэрийн газрын хэтийн төлөвлөлттэй уялдуулан, боловсронгуй болгох зорилгоор Хүний нөөцийн менежментийн тогтолцооны ISO 30400 багц стандарт амжилттай нэвтрүүлж баталгаажуулалтын гэрчилгээ авсан анхны үйлдвэр юм. Мөн “Чадамжийн стандарт”-ыг Монгол Улсын хэмжээнд 26 салбарын мэргэжлийн 1554 ажлын байранд боловсруулан баталгаажуулжээ. Ингэснээр чадамжийн стандартын сан үүсгэн ашиглаж байна.     
       Энэ үеэр Улаанбаатар төмөр зам хувь нийлүүлсэн нийгэмлэгийн Хүний нөөцийн албаны орлогч дарга Б.Ганчулуун “Улаанбаатар төмөр зам 1800 гаруй км зам дагасан ган замчдынхаа нийгэм, хөгжлийн асуудлыг шинэ цагийн хүний нөөцийн бодлогын баримт бичигт, түүнийг дагалдан гарах журмуудад хэрхэн тусгах, ажилтан, албан хаагчид руу чиглэсэн ямар хөтөлбөрүүд хэрэгжүүлж болох талаар харилцан санал солилцож, туршлагаа харамгүй хуваалцаж байгаа Эрдэнэт үйлдвэрийнхэндээ баярлалаа. Шагналын журам, хүний хөгжлийн цогц хөтөлбөр, тэр дундаа “Шинэ ажилтны дасан зохицох хөтөлбөр”, “Залгамж” хөтөлбөр, тэдэнд олгодог багц зэргийг манайх үйл ажиллагаандаа нэвтрүүлэх боломжтой харагдаж байна гэж ярилаа. 
        Өнөөдөр тэд Ил уурхай, Баяжуулах үйлдвэрийн үйл ажиллагаатай танилцаж, Эрдэнэт үйлдвэрийн цахим музей үзсэнээр туршлага судлах аялал өндөрлөх юм.