Ээжээ, хүү нь сайн явна

     Засвар, угсралтын цехээс ажилтнуудын ажил үйлсийг ар гэрт нь сурталчлах, амжилт, бүтээлийг нь танилцуулж, тэдэндээ урам зориг өгөх, гэр бүлийн халуун дулаан уур амьсгал, үнэт зүйлсийг мэдрүүлэх зорилгоор “Ээжээ, хүү нь сайн явна” хүндэтгэлийн үйл ажиллагааг хоёр дахь жилдээ уламжлал болгон өнгөрсөн баасан гарагт зохион байгууллаа. 
     Соёл, урлагийн цогцолборт болсон энэхүү үйл ажиллагаанд тус цехэд үр бүтээлтэй ажиллаж буй хүмүүсийн төлөөлөл 12 ажилтан, ээжийн хамт оролцлоо. Тэд Монгол Улсын баатар үйлдвэрийн цахим музейг үзэж, сонирхов. Мөн ажлын байрнаасаа илгээсэн хүүгийнхээ мэндчилгээ, хүүгийнх нь хамт олныхоо дунд эзлэх байр суурь, мэргэжлийн ур чадвар, зан төлөв, ажлын арвин туршлага зэрэг онцлог чанаруудыг ажилтан бүрээр тодотгон алдаршуулсан нь ээжүүдийн сэтгэлийг ихэд догдлууллаа. 
Цехийн захиргаа ээжүүдэд алд цэнхэр хадаг, цагаан идээний дээж болон эрүүл мэндийн бүтээгдэхүүн бүхий гарын бэлгийг Талархлын хамт ёслол хүндэтгэлтэйгээр гардуулан өгөв. Талархалд: “Монгол Улсын баатар, Зууны манлай бүтээн байгуулалт, Дэлхийн шилдэг аж ахуйн нэгж, Эрдэнэт үйлдвэрт хүү тань бүтээлч хөдөлмөр, ур чадвар, сэтгэл зүрхээ үнэнчээр зориулж, амжилт дүүрэн ажиллаж явааг танд уламжлан, сайн хүү төрүүлж, өсгөсөн сайхан ээж тандаа талархал илэрхийлж, аз жаргал, эрүүл энх, урт удаан наслахыг хүсэн ерөөе” гэжээ. 
     Энэ үеэр оролцогч ээжүүдийг төлөөлөн, ажилтан Э.Энхбаатарын ээж, яруу найрагч Х.Энхжаргал үр хүүхэд, цехийн хамт олонд сэтгэлийн цацал болгон, мялаалгын шүлгээр сонорыг мялаав. Хүүхдүүдийг төлөөлөн ажилтан Ж.Энхдэлгэр ээжүүддээ талархлын үг хэлэв. 
     ЗУЦ-ийн Хүний нөөцийн мэргэжилтэн Ц.Цолмон “Уламжлал болгон зохион байгуулж буй “Ээжээ, хүү нь сайн явна” үйл ажиллагаа маань амжилттай боллоо. Уригдсан эрхэм сайхан ээжүүдийн сэтгэл тэнэгэр, баяр бахдалтай, харц нь хайраар дүүрэн, ээждээ сайн яваагаа дуулгасан, ажилтан залуусын урам сэргэж, улам хичээж, ижийгээ дахин дахин баярлуулах итгэлийн цог асаж байгааг харах үнэхээр сайхан байна” гэж ярив.