Зүрх судас, уушгины эмчийн хяналтад олон жил болж буй ажилтнуудаа нарийн мэргэжлийн үзлэгт хамруулна

      “Эрдэнэт үйлдвэр” ТӨҮГ, П.Н.Шастины нэрэмжит Улсын гуравдугаар төв эмнэлгийн хамтын ажиллагааны хүрээнд тус эмнэлгийн нарийн мэргэжлийн эмч нар энэ сарын 6, 7-ны өдрүүдэд "Эрдэнэт" сувиллын цогцолбор болон “Эрдэнэт медикал” эмнэлэгт ажиллана. Үзлэгийн багийн бүрэлдэхүүнд Улсын гуравдугаар төв эмнэлгийн зүрх судас, мэдрэл, уушги судлалын болон зүрхний шигдээсийн тасгийн эрхлэгч, лавлагаа шатлалын тусламж үйлчилгээний эмч нар багтаж байна. Энэхүү үзлэгийн багийнхантай урьдчилсан байдлаар хоёр удаагийн цахим ярилцлага хийж, нарийн мэргэжлийн үзлэгт хэдэн ажилтан хамруулах талаар тогтож, бэлтгэл хангасан тухай “Эрдэнэт” сувиллын цогцолборын Чанарын менежер Л.Машбат онцлов. 
     Тодруулбал, “Эрдэнэт” сувиллын цогцолборын зүрх судас, мэдрэл, уушгины эмчийн хяналтад олон жил болж буй, “Эрдэнэт Медикал” эмнэлгийн үзлэгээр онош нь тодорсон, лавлагаа шатлалын тусламж үйлчилгээг зайлшгүй авах шаардлагатай ажилтнуудаа хамруулах юм байна. Нийт 143 ажилтан хамрагдах бөгөөд тэдний 52 нь зүрх судасны, 43 нь мэдрэлийн, 48 нь уушгины нарийн шинжилгээ оношилгоог өмнө нь хийлгээд, одоогийн үзлэгт ороход бэлэн болсон байгаа аж. 
      П.Н.Шастины нэрэмжит Улсын гуравдугаар төв эмнэлгийн нарийн мэргэжлийн эмч нарын баг ажиллах бүхий л бэлтгэлийг “Эрдэнэт” сувиллын цогцолбор, “Эрдэнэт Медикал” эмнэлгийн эмч нар хангаж, хамтран ажиллах юм байна.