Хоногт 30 вагон зэсийн баяжмал ачиж байна

        Тээвэр ложистикийн төвийн хамт олон баталсан төлөвлөгөөний дагуу гуравдугаар сард 876 вагон зэсийн баяжмал ачихаар төлөвлөжээ. Одоогийн байдлаар 813 вагон зэсийн баяжмал ачсан бөгөөд хоногийн ачилт 30 вагоноор явагдаж байна. Мөн 3 дугаар сард 30 вагон молибдены баяжмал ачсан аж. Дөрөвдүгээр сард Улаанбаатар төмөр замд 790 вагон зэсийн баяжмал ачих захиалга өгчээ. Түүнчлэн 28 чингэлэг молибдены баяжмал ачих юм. Тээвэр ложистикийн төвийн Ачаа тээврийн хэсгийн мастер Б.Ичинхорлоо: “Улаанбаатар төмөр замд бид сар эхлэхээс 15 хоногийн өмнө урьдчилсан байдлаар захиалга өгдөг. Буулгалтын хувьд орон нутгаар нүүрс, шохой, ган бэлдэц гэх мэт технологийн ачаа ирж байна. Сүүлд хийсэн зургаан мянган тонны гэрээний дагуу “Шунхлай петролиум” компани дизель түлш нийлүүлээд явна. Түрүүч нь ирж байна. Тээрмийн хуяг зарим үйлдвэрлэлийн технологийн хэрэгцээтэй гэрээт бараануудыг импортоор авч байгаа. Өнгөрсөн долоо хоногт дөрвөн вагон хуяг, 37 вагон дизель түлш, хоёр чингэлэг сэлбэг хэрэгсэл гаалийн хяналтын бүсээр ирсэн. Улаанбаатар төмөр зам болон Орхон аймаг дахь Гаалийн газартай бид хамтран ажилладаг. Тээвэрлэлтийн зардлыг цаг тухайд нь төлдөг. Импортын ачаа бараа саатуулагдсан юм алга. Дагаж мөрдөх журмынхаа дагуу ажил хэвийн явагдаж байна” гэв.