Нунтаглан баяжуулах хэсгийн 1А тээрэм солих ажил эхэллээ

      Баяжуулах үйлдвэрийн Нунтаглан баяжуулах хэсгийн МШЦ 5,5х6,5 маркийн, технологийн 1А тээрмийг шинэчлэн солих ажил өнгөрсөн долоо хоногт эхэллээ. Одоогоор хуучин тээрмийг авч, шинийг угсрах суурийн бэлтгэл ажил хийгдэж байна. 20 гаруй жил ажилласан тээрмийг шинэчлэх ажил 1127 цаг үргэлжлэх бөгөөд тавдугаар сарын эхний долоо хоногт тээрмийг залгах төлөвлөгөөтэй ажиллаж байна гэж Баяжуулах үйлдвэрийн Механикийн товчооны дарга Б.Болор-Эрдэнэ ярилаа. 
      Украйн улсад үйлдвэрлэсэн өмнөх тээрэм нь 2000 онд суурилагдан, төлөвлөгөөт засварын системээр найдварт ажиллагааг ханган тасралтгүй ажилласаар ашиглалтын хугацаа дуусжээ. Шинэ тээрэм нь цагт 285 тонн хүдэр нунтаглах хүчин чадалтай. Насжилт өндөр, технологийн үндсэн тоног төхөөрөмжийг ийнхүү шинэчлэн сольсноор төлөвлөгдөөгүй гэмтэл гарах эрсдэлээс сэргийлж, үйлдвэрлэлийн найдварт ажиллагаа бүрэн хангагдаж байна. Хоёрдугаар улиралд Шүүн хатаах хэсэгт зэсийн даралтат шүүлтүүр, Хаягдлын аж ахуйд булинга шахах насосыг цагт 18000 м3 хүчин чадалтай шинэ насосоор солих шинэчлэл хийгдэх юм.