“Бахархан дуурьсах он жилүүд-45” урлагийн бага наадам болж байна

     Эрдэнэт үйлдвэрийн эхний ээлж ашиглалтад орсны 45 жилийн ойг угтан Баяжуулах үйлдвэрийн ажиллагсдын дунд урлагийн авьяастнуудыг тодруулах зорилготой “Бахархан дуурьсах он жилүүд-45” урлагийн бага наадам болж байна. Бага наадмын зорилго нь “Эрдэнэт үйлдвэр” ТӨҮГ-ын 45 жилийн ойн Хүндэтгэлийн тоглолтод Баяжуулах үйлдвэрээс оролцох уран сайханчдыг сонгон шалгаруулах, шинэ залуу авьяастнуудыг нээн илрүүлэх, тэдний чөлөөт цагийг зөв боловсон өнгөрүүлэх, харилцан биесээсээ суралцах, гар сэтгэл нийлсэн баг хамт олныг бүрдүүлэхэд оршиж байгаа юм. 

       Уг наадамд Баяжуулах үйлдвэрийн 14 хэсгийн 200 гаруй ажилтан дуу, бүжиг, хөгжим, бусад буюу гоц авьяастан гэсэн дөрвөн төрлөөр оролцож байна. Соёл, урлагийн цогцолборын мэргэжлийн уран бүтээлчид наадмын шүүгчээр ажиллаж байгаа бөгөөд энэ сарын 21-ээс 30 хүртэл “Урлагийн бага наадам”-ын шалгаруулалт явагдах аж. Эндээс шалгарсан авьяастнууд дөрөвдүгээр сарын 2-нд болох Эрдэнэт үйлдвэрийн 45 жилийн түүхт Хүндэтгэлийн гала тоглолтод оролцох юм. 
      Энэ талаар Арга зүйч Б.Нямдэлгэр: “Түүхт ойн хүрээнд нэлээн олон ажил төлөвлөсний нэг нь энэ Соёл, урлагийн бага наадам. Тус урлагийн наадамд оролцогчдын дунд шинэ залуу авьяастнууд олон байгаа нь бас нэг онцлог. Мөн гуравдугаар сарын 24-өөс 25-нд Баяжуулах үйлдвэрийн сагсан бөмбөгийн аварга шалгаруулах тэмцээн болно. Дөрөвдүгээр сард ажлын байрны дасгал хөдөлгөөнийг хэвшүүлэх аянд манай цех бүрэн хамрагдана. Энэ ажлын хүрээнд ажилтнуудын дунд өдрийн 1010, 1510-ийг дасгалын цаг болгох сарын аян зарласан. Мөн бүх ажилтнууддаа дасгал хөдөлгөөн заах сургагч багш бэлтгэнэ. Дасгалын тэмцээн зохион байгуулна. Шалгарсан хэсгийг шалгаруулж урамшуулна. Өнгөрсөн онд манай цех, Соёл, урлагийн цогцолбортой хамтран “Бид шинэ үеийн залуус“ нэртэй урлагийн үзлэг зохион байгуулсан. Энэ жил “Урлагийн бага наадам”-ыг амжилттай зохион байгуулж байна” гэв.