Дэлхийн усны өдрийг тохиолдуулан “Эрдэнэт үйлдвэр” ТӨҮГ-ын Ус хангамжийн цехийн захиргаа, эцэг эхийн зөвлөл хамтран “Миний мэргэжил-миний бахархал” сэдэвт үйл ажиллагаа зохион байгууллаа. Энэхүү үйл ажиллагаанд ажилтнуудынхаа ахлах ангийн 30 орчим хүүхдийг хамруулав. Тэд хүүхдүүдээ аав ээжийнхээ ажил үйлсээр бахархах, мэргэжлийг нь өвлөх сэдэл төрүүлэх, Чандмань-Эрдэнэ болсон усыг хайрлан гамнаж, ухаалаг хэрэглээг сурталчлахаар зорив.
Цехийн удирдлагууд, эцэг эхийн зөвлөлийнхөн автобус хөлөглөн ирсэн хүүхдүүдээ захиргааны байрандаа хүндэтгэн хүлээн авч, аав ээжийнх нь ажлын онцлог, тэдний үйл хэрэг, гавьяа шагналыг тодруулан мэдээлж, цехийн үйл ажиллагааг танилцуулсан видео кино үзүүлэв. Түүнчлэн Диспетчерийн төв, Ус өргөх станц, Цэвэрлэх байгууламжийн хэсэгт зочлуулав. Хүүхдүүдэд аав, ээжийнхээ ажилтай танилцангаа, усыг хэр холоос, ямар их хөдөлмөр шингээн авчирч, хэрхэн цэвэршүүлдгийг газар дээрээс нь үзсэн нь ихээхэн сонирхолтой байв.
Мөн өнөөдрийн уулзалтаас, усыг гамтай хэрэглэх нь байгаль дэлхийд ямар их ач тустай болох, ус ямар их үнэ цэнтэйг илүүтэй мэдэрснээ ярьж байлаа. Тус цех жил бүр “Дэлхийн усны өдөр”-өөр усны үнэ цэнийг ойлгуулах, хэрэглээг оновчтой болгох зорилтот ажил зохион байгуулдаг уламжлалтай. Өнгөрсөн жил “Хэрэглэгчээ сонсъё” сэдвийн дор хэрэглэгчдийн төлөөллийг урьж, санал солилцон, сургалт хийжээ.
Дэлхий даяар энэ жил Усны өдрийг “Өөрчлөлтийг хурдасгая” уриан дор тэмдэглэж байна. Та болон таны гэр бүл, сургууль, хамт олон усны хэрэглээ, ойлголт, менежментээ өөрчлөх замаар өөрчлөлтийг хийж чадна гэдгийг энэ жилийн “Дэлхийн усны өдөр”-ийн хүрээнд онцгойлон үзэж буй аж.