Хамгаалах хэрэгслийн ханган нийлүүлэлтийн талаар хэлэлцэв

     Эрдэнэт үйлдвэрийн Үйлдвэрчний эвлэлийн холбооноос санал тавьснаар ажилчдын хувцас, хамгаалах хэрэгслийн ханган нийлүүлэлтийн асуудлаар холбогдох бүтцийн нэгжүүдийн удирдлагууд уулзалт зохион байгуулж, тулгамдаж буй асуудлын талаар санал солилцлоо. Уулзалтад “Эрдэнэт үйлдвэр” ТӨҮГ-ын Тамгын газрын дарга Д.Үүрийнтуяа болон ХАБЭА-н хэлтэс, Хөрөнгө оруулалт, худалдан авах ажиллагааны бодлогын газар, Мэдээллийн технологийн хэлтэс, Ажил, үйлчилгээ худалдан авах ажиллагааны хэлтсийн удирдлагууд оролцжээ. Тэд ажилчдын гутал, хувцас, хамгаалах хэрэгслийн хангалт олголтыг сайжруулах чиглэлд хэрхэн ажилласнаа тайлагнаж, цаашид боловсронгуй болгох ямар арга зам байгаа талаар хэлэлцэв. 
     Энэ үеэр ХАБЭА-н хэлтсийн дарга Д.Мөнхболд ажилчдын гутал, хувцас, хамгаалах хэрэгслийг 4-р сарын нэгнээс олгох нөөц бүрдээд байгааг мэдээллээ. Ингэхдээ ажилчдын хувцасны эдэлгээг харгалзан, хэрэгцээ шаардлагын дагуу олгох юм байна. Учир нь ажлын гутал, хамгаалах хэрэгсэл зарим ажилчдад хүрэлцэхгүй байхад нэг хэсэг нь гадагш нь зардаг үзэгдэл газар авч байгааг ч хэлэлцүүлгийн үеэр хөндсөн юм. Иймээс ХАБЭА хэлтэс ҮЭ-ийн холбоотой хамтран ажилчдын гутал, хувцасны эдэлгээ, хэрэглээнд хяналт тавин ажиллахаар болжээ. 
     “Хэдийгээр Эрдэнэт үйлдвэр хэмнэлтийн бодлого хэрэгжүүлэн ажиллаж байгаа ч ажилчдын хувцас, хамгаалах хэрэгсэлд хэмнэлт байх ёсгүй. Харин хангалт илүү бодитой хэрэглээтэй байх учиртай” гэж Тамгын газрын дарга Д.Үүрийнтуяа онцолсон юм. 
Үйлдвэрийн газрын ажилчид тусгай хувцас, гутлынхаа хэмжээг зөв тодорхойлж энэ сарын 20-ны дотор ХЭМАБ-ын программд оруулах шаардлагатайг ХАБЭА-н хэлтсээс мэдээллээ.