Монгол Улсад Орчин цагийн Уул уурхайн салбар үүсэж хөгжсөний түүхт тэгш ойг тохиолдуулан Уул уурхай, хүнд үйлдвэрийн сайд Ж.Ганбаатар тус салбарын хөгжилд үнэтэй хувь нэмэр оруулсан ”Эрдэнэт үйлдвэр” ТӨҮГ-ын ажилтнуудыг Уул уурхайн 100 жилийн ойн медалиар шагнасныг Үйлдвэрийн газрын удирдлагууд өнөөдөр гардууллаа.
Шагнал гардуулах ёслолыг ”Эрдэнэт үйлдвэр” ТӨҮГ-ын Ерөнхий инженер, Аж үйлдвэрийн гавьяат ажилтан Т.Батмөнх нээж хэлсэн үгэндээ, Өнөөдрийн байдлаар геологи, уул уурхайн салбарт 60 гаруй мянган хүн ажиллаж байна. Монгол Улсын эдийн засгийн дөрөвний нэгийг, нийт экспортын 90 гаруй хувийг, төсвийн орлогын 30 орчим хувийг, мөн гадаад хөрөнгө оруулалтын 70 гаруй хувийг уул уурхайн салбар дангаараа бүрдүүлж, улс орны эдийн засгийн гол хөдөлгөгч хүч болон хөгжиж байгааг онцолсон юм. 2023 он бол Уул уурхайн салбарын дараагийн 100 жилийн хөгжлийн гарааны жил төдийгүй Эрдэнэт үйлдвэрийг байгуулах анхны хэлэлцээр байгуулагдсаны 50 жил, анхны баяжмалаа экспортод ачиж, үйл ажиллагаагаа эхэлсний 45 жилийн түүхт ой тохиож байгааг цохон тэмдэглээд, салбарын хөгжлийг түүчээлж яваа Улсын баатар үйлдвэрийнхээ уурхайчин хамт олонд улам их амжилт, аз жаргалын ерөөл дэвшүүлэв.
Эрдэнэт үйлдвэрийн тулгын чулууг тавилцсан анхдагч, ахмад ажилтнууд, олон жил үр бүтээлтэй ажилласан хөдөлмөрийн сайчууд, энэ цагийн бүтээн байгуулалтыг гардан хэрэгжүүлж, манлайлж яваа шилдгүүдийн төлөөлөл болсон 350 ажилтан Уул уурхайн салбар үүсэж хөгжсөний 100 жилийн ойн дурсгалын медалиар өнөөдөр энгэрээ гоёлоо. Шагнал гардуулах ёслол “Эрдэнэт үйлдвэр” ТӨҮГ-ын Ерөнхий захиргааны нэг, хоёрдугаар байр, Засвар механикийн завод, Соёл, урлагийн цогцолборт хэсэгчлэн зохион байгуулагдаж, уурхайчдад шагналын хур буусан юм.