“Эрдэнэт үйлдвэр” ТӨҮГ-ын харьяа “Эрдэнэт Медикал” төрөлжсөн мэргэжлийн төв эмнэлэг, Орхон аймгийн Эрүүл мэндийн газар хамтран тус аймгийн эрүүл мэндийн салбарынхны уулзалт зохион байгууллаа. Уулзалтад зохион байгуулагч талууд, АЗДТГ-ын Төрийн захиргаа, удирдлагын хэлтэс, Бүсийн оношилгоо эмчилгээний төв болон тус аймагт үйл ажиллагаа явуулж буй эрүүл мэндийн байгууллага, хувийн хэвшлийн эмнэлгийн удирдлага, мэргэжилтнүүд оролцов.
Өнөөдрийн байдлаар, Орхон аймгийн 100 гаруй мянган хүн амд төр болон хувийн хэвшлийн 40 орчим эмнэлгийн байгууллага эрүүл мэндийн тусламж үйлчилгээ үзүүлж буй статистик мэдээ бий. “Эрүүл мэндийн тусламж үйлчилгээ” хэмээх энэхүү том хөлөг онгоцыг зөв залж, чиглүүлэхэд эрүүл мэндийн байгууллагуудын хамтын ажиллагаа, нягт харилцаа юу юунаас илүү чухал. Иймээс тус уулзалтыг хоорондын уялдаа холбоогоо сайжруулж, харилцан дэмжиж, хамтран ажиллах, цаашдын төлөвөө тодорхойлох зорилгоор зохион байгуулж буйг “Эрдэнэт үйлдвэр” ТӨҮГ-ын Хамтын ажиллагаа, нийгмийн харилцааны газрын дарга, “Эрдэнэт Медикал” эмнэлгийн Гүйцэтгэх захирлын үүрэг гүйцэтгэгч Ц.Бат-Энх уулзалтын эхэнд онцлов.
Мөн тэрээр, Монгол Улсын Засгийн газрын тогтоолоор өнгөрсөн оны 4 дүгээр сард Эрдэнэт үйлдвэрийн харьяанд шилжиж, эрүүл мэндийн төрөлжсөн мэргэжлийн төв эмнэлэг болон ажиллаж буй “Эрдэнэт Медикал” эмнэлгийн үйл ажиллагаа, гадаад хамтын ажиллагааны талаар мэдээлэл хийж, зарим төрлийн нарийн оношилгоо эмчилгээний технологийг орон нутагтаа нутагшуулах, гаднын эмнэлэг зорьсон иргэдийн урсгалыг сааруулах зэрэг олон зорилт дэвшүүлж буйг мэдээллээ. Түүнчлэн, Орхон аймагт эрүүл мэндийн тусламж үйлчилгээ эрхэлж буй хувийн эмнэлгүүдийн үйлчлүүлэгчдийг нь MRI болон бусад нарийн оношилгоонд хамрагдахад нь туслалцаа үзүүлэх, урьдчилан сэргийлэх үзлэг, эрт илрүүлгийг хамтран зохион байгуулах боломжтой гэдгийг ч дурдлаа. Уулзалтын үеэр гарах санал дүгнэлтийг нэгтгэн, цаашдын үйл ажиллагаандаа тусгаж, эрүүл мэндийн байгууллагуудын хамтын ажиллагааг шат ахиулахад анхаарч ажиллах нь энэхүү уулзалтын ач холбогдол, үр дүн гэж онцлов.
Орхон аймгийн Засаг даргын тамгын газрын Төрийн захиргаа, удирдлагын хэлтсийн дарга М.Жанболат, Эрүүл мэндийн газрын дарга Д.Сүхээ нар эрүүл мэндийн тусламж үйлчилгээний чиглэлээр баримталж буй бодлого, зорилтын талаар мэдээлэл хийв. Орхон аймгийн хэмжээнд төр болон хувийн хэвшлийн эрүүл мэндийн чиглэлийн 177 байгууллага үйл ажиллагаа явуулж, тэдгээрт 2000 гаруй эмч, эмнэлгийн ажилтан, тусгай мэргэжилтнүүд ажиллаж байна. Нийт 1007 ортой бөгөөд 1000 хүн тутамд 105 ор ноогддог. Нэг эмчид 240, нэг сувилагчид 218 үйлчлүүлэгч оногдож буй аж. Энэ үзүүлэлтээс харахад Орхон аймаг, Эрдэнэт хотын эрүүл мэндийн байгууллагуудын хүртээмж, хүчин чадал боломжийн түвшинд хүрсэн гэж мэргэжилтнүүд үздэг байна.