Эрдэнэт үйлдвэрийн Баяжуулах үйлдвэрийн Эмэгтэйчүүдийн зөвлөлийн санаачилгаар амьжиргааны баталгаажих төвшнөөс доогуур орлоготой нэг өрхөд өргөө цагаан гэр бэлэглэх “Сэтгэлийн дэм” сайн үйлсийн аян амжилттай явагдлаа. Олон Улсын Эмэгтэйчүүдийн эрхийг хамгаалах өдрийг угтан зохион байгуулсан тус аяны хүрээнд ажлын хэсгийнхэн иргэдтэй уулзаж ярилцан, багуудын зорилтот бүлгийн айл өрхүүдээр биечлэн танилцжээ.
Сайн үйлсийн аянд Говил багт 16 дахь жилдээ амьдарч байгаа, өрх толгойлсон нэгэн эмэгтэй сонгогдсон байна. Тэрээр дөрвөн хүүхдийн хамт амьдардаг, тодорхой эрхэлсэн ажилгүй хэдий ч олдсон ажлыг гололгүй хийж, сард 500 орчим мянган төгрөгийн орлого олж, орлогоосоо лизингээр авсан хашааны төлбөрөө төлдөг байна. Баяжуулах үйлдвэрийн залуучуудын төлөөлөл болон Эмэгтэйчүүдийн зөвлөлийн хамт олон энэ сарын 06-ны өдөр таван ханатай гэр барьж, халуун сэтгэлийн дэмээр ийнхүү нэгэн өрхийг өргөө цагаан гэртэй болголоо.
Эрдэнэт үйлдвэрийн хамгийн том цех болох Баяжуулах үйлдвэрийн нийт ажилтны 350 нь эмэгтэй ажилтан бөгөөд эдгээрээс 48 нь хүүхэд асрах чөлөөтэй байгааг зөвлөлийн тэргүүн С.Сэрээнэнжав хэлж байлаа. Аянд цехийн нийт бүсгүйчүүд хандив өргөж, 4 орчим сая төгрөгөөр таван ханатай гэр болон хоёр ширхэг ор, гар нүүрийн угаалтуур худалдан авч гэрийг нь тохижуулсан байна. Мөн тус цехийн Засварын хэсгийн хамт олон зуух хийж өгсөн бол Өөрөө нунтаглах хэсгийнхэн тог цахилгаан татах, холбох ажилд туслалцаа үзүүлжээ.
Улс орныхоо хөгжилд үнэтэй хувь нэмэр оруулж яваа баяжуулагч бүсгүйчүүд ийнхүү нийгэмд эерэгээр үлгэрлэж, нийтийн хүчээр нэгнээ дэмнэн тусалж болдгийг тод томруунаар харууллаа. Сайн үйлс бүхэн дэлгэрэх болтугай.
Нийт баяжуулагч бүсгүйчүүддээ Олон Улсын Эмэгтэйчүүдийн эрхийг хамгаалах өдрийн мэндийг хүргэе.
Нар 06:46 минутад мандаж 19:11 минутад жаргана.
Үс засуулвал: Бие эрхтний хүч сайжирна.
Суудал: Мод
