“Эмэгтэйчүүдийн хөгжил оролцоо” чуулган боллоо

     Олон улсын Эмэгтэйчүүдийн эрхийг хамгаалах өдрийг тохиолдуулан МЭХ-ны Орхон аймгийн салбар зөвлөлөөс санаачлан зохион байгуулсан баярын хурал өнөөдөр Соёл, урлагийн цогцолборт боллоо. Хурлын үйл ажиллагаанд аймгийн ИТХ-ын дарга Д.Мөнхбат, Засаг даргын орлогч А.Түвшинжаргал, МЭХ-ны Орхон аймгийн салбарын анхны дарга Л.Дуламсүрэн, МЭХ-ны Орхон аймгийн салбар зөвлөлийн тэргүүн Д.Үүрийнтуяа, АЗДТГ-ын Нийгмийн бодлогын хэлтсийн дарга А.Бумансор нарын албаны хүмүүс болон Орхон аймгийн эмэгтэйчүүдийн төлөөлөл оролцов. 

     Баярын хурлыг МЭХ-ны Орхон аймгийн салбар зөвлөлийн тэргүүн Д.Үүрийнтуяа нээж үг хэлэв. Тэрбээр “Бидний урилгыг хүлээн авч хүрэлцэн ирсэн бүх хүмүүст энэ түүхэн баярт өдрийн мэндийг хүргэе. МЭХ-ны Орхон аймгийн салбар зөвлөл 2019 онд шинэчлэн байгуулагдаж, тэргүүнээ сонгон, тэргүүлэгч гишүүдээ дэмжин хуралдаж байсан нь саяхан мэт боловч дөрвөн жил өнгөрсөн байна. Энэ хугацаанд Орхон аймгийн нийт хүн амын 51,6 хувийг эзэлж буй эмэгтэйчүүдийнхээ эрх ашгийг хамгаалж тэдэнд хүрч үйлчлэхийн төлөө тасралтгүй үйл ажиллагаа явуулж ирлээ. Өнгөрсөн дөрвөн жилийн хоёрд нь цар тахлын амаргүй хүнд үеийг даван туулсан. Ийм хүнд үед ч Эмэгтэйчүүдийн байгууллага бүсгүйчүүддээ хүрч, тэдний дуу хоолой болж, сэтгэлийн дэм өгч, амьдрах арга ухаанд сургах чиглэлээр хамтран ажилласаар өнөөдөртэй золгож байна. Энэ онд спортлог байж, бүсгүйчүүд хамтдаа асуудлыг авч хэлэлцсэн, эрүүл мэнддээ анхаарсан, баг хамт олон болохын төлөө нэгдэж, биесээ ойлгон ажиллахыг зорьсон. Бид 21 баг, салбар зөвлөлийн байгууллагуудын дунд Эмэгтэйчүүдийн эрхийг хамгаалах өдрийг угтан спортын гурван төрлийн тэмцээн зохион байгууллаа. Эрдэнэт хот анх удаа Эмэгтэйчүүдийн хөтөлбөрийг баталсан аймаг боллоо. Энэ хөтөлбөрийн хүрээнд хийх ажлаа жил бүр төлөвлөөд явж байгаа. Цаашид ахмад, дунд, залуу гурван үеийн алтан хэлхээн дээр Эмэгтэйчүүдийн байгууллагын үйл ажиллагаа явагдах болно. Мөн Орхон аймгийн Эмэгтэйчүүдийн холбооны үйл ажиллагааг зохион байгуулалтаар дэмжин ажилладаг бүх байгууллагын удирдлага, хамт олонд эмэгтэйчүүдийнхээ нэрийн өмнөөс болон хувиасаа чин сэтгэлийн халуун талархал дэвшүүлье” гэв. 

     Орхон аймгийн ИТХ-ын дарга Д.Мөнхбат хэлсэн үгэндээ, “Дэлхийн улс орон хүйсийн тэгш байдал, эмэгтэйчүүдийн манлайлал, эдийн засаг, улс төр, нийгэм, гэр бүлийн амьдралд эмэгтэйчүүдийн эзлэх байр суурийг бэхжүүлэх, нэмэгдүүлэхэд өөр өөрийн арга барилаар анхаарал хандуулж ирсэн. Монгол Улсын нийт хүн амын 51 хувийг эмэгтэйчүүд эзэлдэг ч улс төр, нийгмийн аль ч салбарын албан тушаалд эмэгтэйчүүдийн төлөөлөл хангалтгүй байгаа нь бид хүйсийн тэнцвэрт байдлыг хангах, эмэгтэйчүүдийг дэмжих, идэвхжүүлэх зүй ёсны шаардлага гарч байгаагийн илрэл юм. Иймээс Орхон аймгийн ИТХ-ын найм дахь удаагийн бүрэн эрхийн хугацаанд анх удаа Эмэгтэйчүүдийн хөгжлийн хөтөлбөр хэрэгжүүлэхээр баталсан. Хөгжлийн хөтөлбөрийн хүрээнд эмэгтэйчүүдийн эрх, хөгжил, өнөөгийн байдал, эмэгтэйчүүдийн манлайлал зэрэг олон төрлийн арга хэмжээ зохион байгуулж, тодорхой үр дүн гарч байгаад аймгийн Иргэдийн төлөөлөгчдийн хурал болон хувиасаа талархалтай хандаж байна. Орхон аймагт 56 мянган хүн ажил хөдөлмөр эрхэлдгийн 48 хувь нь эмэгтэйчүүд бөгөөд хүнс, хөнгөн үйлдвэр, худалдаа үйлдвэр бусад салбарт ажиллаж улс орны хөгжилд үнэтэй хувь нэмэр оруулж байна. Орон нутгийн зүгээс баримталж буй бодлого үргэлж эмэгтэйчүүд, хүүхэд багачуудад ээлтэй байж, хүнс хөдөө аж ахуй, хөнгөн үйлдвэрийг дэмжиж, төр болон хувийн хэвшлийн байгууллагатай харилцан ашигтай хамтран ажиллаж ирсэн арвин туршлагаа үргэлжлүүлэх болно” хэмээн онцлов. 

     Дараа нь МЭХ-ны Орхон аймгийн салбар зөвлөлийн тэргүүн Д.Үүрийнтуяа хийж хэрэгжүүлсэн ажлаа товч тайлагнаж, “Шүүдэр охидын төв”-ийн гишүүн Д.Анх-Эрдэнэ “Ирээдүйн ээжийн асуудал” сэдэвт илтгэл тавив. Мөн Эмэгтэйчүүдийн эрхийг хамгаалах өдрийг угтан зохион байгуулсан шатар, дартс, волейболын тэмцээнд амжилттай оролцож эхний гурван байр эзэлсэн баг, тамирчдад шагнал гардууллаа. Түүнчлэн МЭХ, Орхон аймгийн салбар зөвлөлүүдийн шагналыг гардуулж, хүндэтгэлийн концерт тоглосноор Олон улсын Эмэгтэйчүүдийн эрхийг хамгаалах өдөрт зориулсан баярын үйл ажиллагаа өндөрлөлөө.