Баяжуулах үйлдвэрийн эхний ээлж ашиглалтад орсон түүхт 45 жилийн ой, Сар шинийн баярыг тохиолдуулан тус цехийн Захиргаа, Ахмадын зөвлөлөөс хамтран ахмадуудаа хүлээн авч, хүндэтгэл үзүүллээ. Ахмадын сар шинийн золгуут, хүндэтгэл үзүүлэх өдөрлөгийн үйл ажиллагаанд тус цехийн 14 хэсгийн 150 орчим ахмад оролцож, нэгэн өдрийг хамт олноороо өнгөрүүллээ. Өдөрлөгийн нээлтийн үеэр цехийн дарга асан, Монгол Улсын Аж үйлдвэрийн Гавьяат ажилтан Р.Дэлгэр, цехийн дарга М.Отгон нар үг хэлж, бахархалт түүхийн эзэд болсон ахмад баяжуулагч нартаа эрүүл энх, саруул сайхныг хүсэн ерөөсөн юм.
Өдөрлөгийн үеэр ахмад болон залуу үеийн төлөөллүүд ая дууны эгшгийн цэнхэр хадаг өргөн барьж, сар шинийн босгон дээр зарим ахмад ажилтныг Монгол Улсад Уул уурхайн салбар үүсэж хөгжсөний 100 жилийн ойн хүндэт тэмдэг, Эрчим хүчний яамны жуух бичиг, Орхон аймгийн хүндэт тэмдгээр тус тус шагнан урамшууллаа.
Энэ өдөр Баяжуулах үйлдвэрийн 14 хэсгийн ахмадын дунд “Шагай шүүрэх”, “Дөрвөн бэрх” тэмцээнийг зохион байгуулж, “Шагай шүүрэх” тэмцээний 1-р байранд Механик-боловсруулалт ба бигнүүрийн хэсэг, 2-р байранд Бутлан тээвэрлэх хэсэг, 3-р байранд Урвалжийн хэсгийн ахмадын баг шалгарлаа. Мөн “Дөрвөн бэрх” тэмцээний 1-р байранд Дулаан агааржуулалтын хэсгийн ахмад Н.Уранцэцэг, 2-р байранд Засварын хэсгийн ахмад Б.Зоригт нар шалгарсан байна.
Эрдэнэт үйлдвэрийн Баяжуулах үйлдвэр эдүгээ 530 гаруй ахмадтай өнөр бүл болж, цехийн захиргаанаас өдөрлөгт хүрэлцэн ирсэн нийт ахмад ажилтнууддаа гарын бэлэг гардуулан өглөө.