“Эрдэнэт үйлдвэр” ТӨҮГ-ын Олон нийттэй харилцах албаны “Эрдэнэт” телевизийн нэвтрүүлэгч П.Энхтуяа усан туулай жилийн сар шинийн босгон дээр Монгол Улсын Ерөнхийлөгчийн зарлигаар төрийн дээд шагнал, Хөдөлмөрийн гавьяаны улаан тугийн одонгоор энгэрээ мялаалаа. Зууны манлай Эрдэнэт үйлдвэр, Эрдэнэт хотын анхны нэвтрүүлэгчдийн нэг тэрбээр орон нутгийн анхны телестуди байгуулагдах үеэс эхлэн өнөөг хүртэл 30 дахь жилдээ тасралтгүй ажиллаж байна. Тэрээр орон нутагт мэргэжлийн телевизийн урлаг үүсэж хөгжих, тэр тусмаа Эрдэнэт үйлдвэрийн хэвлэл мэдээллийн алба өргөжин тэлж, бэхжиж ирсэн бүхий л цаг үед анхны нэвтрүүлэгч, уурхайчдын ажил үйлсийг олон түмэнд цэнхэр дэлгэц, радио долгионоор хүргэх нүүр царай, дуу хоолой болж ирсэн юм. Эрдэнэт хотын жил жилийн Ардын хувьсгалын их баяр наадмууд, хүндэтгэлийн концерт, түүхэн үйл явдал, ёслолын үйл ажиллагааг хөтлөхийн зэрэгцээ өөрийн урын санг баяжуулан, уран бүтээлчийн тасралтгүй эрэлхийллээр “Миний өгүүлсэн хорвоо”, “Насны гурван судар” уран яруу уншлага бүхий нийтлэл өгүүллэгийн хос ауди цомог гаргаж, сонсогчдынхоо сонорт хүргэжээ. Мөн өөрийн уран бүтээлийн дээжээс нэгтгэн “Сайн уу Сайнаа” тайз дэлгэц хосолсон тоглолтыг анх удаа орон нутагт уурхайчид, үзэгч түмэндээ толилуулсан байна. Түүний санаачлагаар жил бүрийн Мартын 8-ны өдөрт зориулан уурхайчдын дунд зохион байгуулдаг “Ижийдээ захидал бичээрэй” уралдаан нь хүн бүрт ухаарал, хайр энэрлийн хамгийн сайхан үгсийг нэгэн дор цогцлоодог сайхан арга хэмжээ болоод зогсохгүй эдүгээ Орхон аймаг, Эрдэнэт хот даяар өрнүүлдэг үйл ажиллагаа болон өргөжсөөр байна. Ямар ч цаг үед бэлэн байх ёстой телевизийн нэвтрүүлэгчийн хариуцлагатай бөгөөд алдах эрхгүй албанд үнэнч, цэгцтэй хандаж ирсэн нэвтрүүлэгч П.Энхтуяагийн унаган авьяас, торгон тослог дуу хоолойг нэгэнтээ урлаг соёлын алдартан, мэргэжилнүүд “Эрдэнэтийн хамбан хоолой” хэмээн тодорхойлсон байдаг. Ард түмнийхээ сонор мэлмийг баясгаж, соён гэгээрүүлэх үйлсэд хагас жарны турш сэтгэл зүтгэлээ зориулж яваа нэвтрүүлэгч П.Энхтуяа ийнхүү Монгол улсад үндэсний сэтгүүлзүй үүсэж хөгжсөний 110 жилийн түүхт ойгоор Хөдлмөрийн гавьяаны улаан тугийн одонт нэвтрүүлэгч боллоо.
Нар минутад мандаж минутад жаргана.
Үс засуулвал: 
Суудал: 
