ММС-1 тээрмийн хөдөлгүүрийг шинэчилж байна

     Баяжуулах үйлдвэрийн техник технологийн шинэчлэлийн хүрээнд Өөрөө нунтаглах хэсгийн хүдэр нунтаглах ММС-1 тээрмийн 4Мвт чадал бүхий цахилгаан хөдөлгүүрийг шинэчилж байна. Хуучин хөдөлгүүр 32 жил ажилласан бөгөөд үүнийг орчин үеийн АВВ фирмийнхээр сольж байгаа аж. Мөн хөдөлгүүрээс гадна өндөр хүчин чадалтай давтамж хувиргагч, автомат удирдлагын систем зэрэг цахилгааны бүхий л системийг шинээр суурилуулж байна. Энэхүү шинэчлэлээр тээрмийн хөдөлгүүрийг байнгын давтамж хувиргагчаас тэжээж, хурдыг удирдах боломжтой болж буй юм. Хүдрийн хатуулгаас хамаарч, хурдыг өөрчилснөөр нунтаглалтыг сайжруулах, гарцыг нэмэгдүүлэх, бүтээмж дээшлүүлэх боломж бүрдэж байгаа юм. Түүнчлэн тээрмийг зөөлөн асааж, зогсоох боломжтой болсноор ган бөөрөнцөг болон хуягийн элэгдлийг тодорхой хувиар бууруулах боломж бүрдэнэ. Мөн тээрмийг дурын хурдаар эргүүлж давтамж хувиргагчаас тэжээж ажиллуулснаар цахилгаан эрчим хүчний зардлыг жилд 320 сая төгрөгөөр хэмнэх урьдчилсан тооцоо гарч байна, гэж Эрчим зүйн товчооны дарга Ц.Намжилдорж ярилаа. Энэ ажлын хүрээнд хуучин хөдөлгүүрийг задлан авч, суурийн бетоныг нураасан. Одоо шинэ суурь цутган, цахилгааны монтажийн ажил хийж, хөдөлгүүрээ суурилуулахаар ажиллаж байна. Уг тээрмийг 888 цаг зогсоож, дээрх ажлуудыг хийж, энэ сарын 28-нд хүлээлгэж өгөх төлөвлөгөөтэй. Энэ томоохон засвар, шинэчлэлийн ажлыг Эрдэнэт үйлдвэрийн ажилтнууд өөрсдийн хүчээр хийж, хугацаанаас нь өмнө ашиглалтад оруулахаар шамдан ажиллаж байна.