Монгол улсад Уул уурхайн салбар үүсэж, хөгжсөний 100 жил, Эрдэнэт үйлдвэрийн эхний ээлж ашиглалтад орсны түүхт 44 жилийн ойг угтан Баяжуулах үйлдвэрийн ажилчдын дунд ажил мэргэжлийн нэг сарын уралдаан зарлалаа. Монгол Улсын Аж үйлдвэрийн гавьяат ажилтан, Хөвүүлэн баяжуулагч Р.Баярын нэрэмжит ажил мэргэжлийн уралдааны нээлт Үйлдвэрийн газрын ерөнхий захиргааны нэгдүгээр байранд болов. Тус уралдааны эцсийн дүнг ирэх 12-р сарын 14-нд гаргана. Нэг сарын хугацаатай энэхүү уралдаанд 3, 4-р зэрэгтэй ажилчид Баяжуулагч мэргэжлийн зургаан чиглэлээр оролцоно. Тодруулбал, хөвүүлэн баяжуулагч, бутлуурчин, усгүйжүүлэгч, коневейерын болон насосны машинч зэрэг 124 ажилчин уралдаанд оролцохоор болжээ.
Уралдаанд оролцогчдын дундаж нас нь 30, үйлдвэрт 4-5 жил ажилласан гэсэн судалгаа гарсан байна. Уралдаан хоёр үе шаттай явагдах бөгөөд эхний удаа ажилчдаас онолын шалгалт тестээр авна. Дараа нь мэргэжлийн ур чадварын шалгалтыг ажлын байрандаа өгөх юм. Ажил мэргэжлийн уралдааныг цехийн удирдлагууд болон баяжуулалтын чиглэлийн мэргэжилтнүүд дүгнэн шалгаруулах аж. “Гурваас доошгүй жил ажилласан ажилтан сургалтад хамрагдан, шалгалт өгч мэргэжлийн зэргээ ахиулж ирсэн. Тэгвэл ажил мэргэжлийн уралдаанд оролцогчид хугацаанаасаа өмнө зэргээ ахиулах боломжтой. Энэ утгаараа тухайн ажилтанд их урам өгдөг. Мөн уралдааны удирдамжийн дагуу ажилчдын онолын мэдлэгийг сэргээх зорилгоор давтан болон ганцаарчилсан сургалт явагдана. Хамгийн гол нь ажилтан ажилдаа сэтгэлтэй, зөв харилцаа, хандлагатай байх явдал маш чухал юм” гэж Баяжуулах үйлдвэрийн Хүний нөөцийн товчооны Тэргүүлэх мэргэжилтэн Т.Тунгалагтамир ярилаа.
Нар минутад мандаж минутад жаргана.
Үс засуулвал: 
Суудал: 
