“Алтан бамбай-2022” тэмцээн эхэллээ

М.Балжинням
Сэтгүүлч
“Алтан бамбай-2022”  тэмцээн эхэллээ

      Монгол Улсын Гамшгаас хамгаалах тухай хууль, Галын аюулгүй байдлын тухай хууль, тогтоомжийн хэрэгжилтийг хангах, ажилтнуудад уул уурхайн үйлдвэрлэлийн явцад гарч болзошгүй аваар осол, онцгой байдал, гал түймэр, гамшигтай тэмцэх, аврах ажиллагааны талаар чадвар эзэмшүүлэх, мэдлэг туршлага олгох, бэлэн байдлыг сайжруулах зорилготой “Алтан бамбай-2022” аврах ажиллагааны тэмцээн өнөөдөр эхэллээ. Энэ удаагийн “Алтан бамбай” тэмцээн Монгол улсад Уул уурхайн салбар үүсэж хөгжсөний 100 жилийн хүрээнд зохиогдож байна. Мөн өмнөх жилүүдэд Эрдэнэт үйлдвэр зөвхөн дотооддоо явуулдаг байсан бол энэ жил улсын хэмжээнд Уул уурхайн салбарын аж ахуйн нэгж, компаниудын дунд өргөн хүрээтэй зохион байгуулж буйгаараа онцлогтойг “Эрдэнэт үйлдвэр” ТӨҮГ-ын Ерөнхий инженер Т.Батмөнх тэмцээний нээлтийн үгэндээ тэмдэглэв.

      “Алтан бамбай” аврах ажиллагааны тэмцээнийг 2008 онд анх Эрдэнэт үйлдвэрийн ХАБЭА-н хэлтсийн Цацрагийн аюулгүй албаны Тэргүүлэх инженер Ц.Оргил, Эрүүл ахуйн албаны дарга О.Алтансүх, Тээвэр ложистикийн төвийн цахилгаан механик инженер М.Сүхбаатар нар санаачлан, Эрдэнэт үйлдвэрийн ХАБЭА-н хэлтэс, Гал унтраах 58 дугаар анги, Гамшгаас хамгаалах алба, “Эрдэнэт” сувиллын цогцолбор, Залуучуудын холбоо хамтран зохион байгуулж байв. 

      Арав дахь удаагаа болж буй тус тэмцээнд Эрдэнэт үйлдвэрийн зургаан баг,  “Монголын алт”, “Баян айраг”, “Бороо гоулд”, “Эрдмин” зэрэг уул уурхайн томоохон компанийн 10 баг оролцож байна. Тэмцээний ерөнхий зохион байгуулагчаар Уул уурхай, хүнд үйлдвэрийн яам, “Эрдэнэт үйлдвэр” ТӨҮГ, Монголын Мэргэшсэн хөдөлмөрийн аюулгүй байдал, эрүүл ахуйн мэргэжилтнүүдийн холбоо хамтран ажиллаж байна. 

     “Алтан бамбай-2022” аврах ажиллагааны тэмцээний нээлтийн ажиллагаанд Уул уурхай, хүнд үйлдвэрийн яам, Онцгой байдлын Ерөнхий газрын төлөөлөл, “Эрдэнэт үйлдвэр” ТӨҮГ-ын удирдлага, ажилтнууд болон хөгжөөн дэмжигчид хүрэлцэн иржээ. Уг тэмцээний ач холбогдлыг үнэлж хэлсэн үгэндээ Уул уурхай, хүнд үйлдвэрийн яамны бодлогын газрын мэргэжилтэн, ХАБЭА-н салбарын хорооны нарийн бичгийн дарга Н.Амартуул “Манай яамны зүгээс Эрдэнэт үйлдвэрт санал тавьж, дотооддоо зохион байгуулдаг “Алтан бамбай” тэмцээнээ нээлттэй болгож, салбарын баг төлөөлөгчдийг урьж оролцуулан, өргөн хүрээнд явуулахыг хүссэн. Уул уурхайн салбарынхан аврах ажиллагааны ур чадвар, авхаалж самбаагаараа уралдах ийм боломж олгосон Эрдэнэт үйлдвэрийн хамт олонд талархал илэрхийлье. Бие биеэсээ туршлага судалж, чадвараа ахиулж, дараагийн тэмцээнүүд илүү өргөн болох үүд хаалга нээгдэж буйд баяртай байна” гэсэн юм. 

     Энэ удаагийн “Алтан бамбай-2022” тэмцээн Зам тээврийн ослын аврах ажиллагаа, Барилга байгууламжийн аврах ажиллагаа, Газар доорх буюу хязгаарлагдмал орчны аврах ажиллагаа, Нурангийн аврах ажиллагаа гэсэн үндсэн дөрвөн төрлөөр явагдана. Тэмцээний шүүгчээр Гал түймэр унтраах 58 дугаар ангийн ахлах дэслэгч Б.Амарбаяр, “Эрдэнэт” сувиллын цогцолборын Түргэн тусламжийн тасгийн эрхлэгч, их эмч Ц.Батаа, их эмч Г.Ганзориг, Гамшгаас хамгаалах штабын тэргүүлэх мэргэжилтэн Р.Энхболд, ХАБЭА-н хэлтсийн Эрүүл ахуйн товчооны дарга О.Алтансүх нарын мэргэжлийн баг ажиллаж байна. “Алтан бамбай-2022” тэмцээний ялагчид өнөөдөр тодорно.  

Б.Баттөгс
Зурагчин

Сэтгэгдэл бичих

Уншигчдын бичсэн сэтгэгдэлд erdenettoday.mn хариуцлага хүлээхгүй болно. Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.