Судалгаа, шинжилгээний хүрээлэнд инновацын төсөл хэрэгжиж байна

М.Балжинням
Сэтгүүлч
Судалгаа,  шинжилгээний хүрээлэнд инновацын төсөл хэрэгжиж байна

     Уул уурхайн салбар үүсэж хөгжсөний 100 жилийн ой угтсан “100 бүтээлч ажил” аяны хүрээнд Эрдэнэт үйлдвэрийн Судалгаа, шинжилгээний хүрээлэнгийнхэн хоёр бүтээлч төсөл хэрэгжүүлж байна. Инновацыг үйлдвэрлэлд нэвтрүүлэх зорилготой төслүүдийн эхнийх нь “Шахмал түлшний органик барьцалдуулагч гарган авах” судалгаа юм.  

     Эрдэнэт үйлдвэрийн стратеги төлөвлөгөөнд тусгагдсан Зэс хайлуулах үйлдвэр барьж байгуулах төслийн бэлтгэл ажлын хүрээнд тухайн үйлдвэрлэлээс үүсэх хүхрийн хүчлийг саармагжуулах, нэмүү өртөг шингэсэн бүтээгдэхүүн үйлдвэрлэх боломжийг тогтмол эрэлхийлж, судалж байна. Өөрөөр хэлбэл, Зэс хайлуулах үйлдвэрийн үйлдвэрлэлийн үйл явцаас үүсэх хүхрийн хүчлийн уусмалын оролцоотой хаягдал арьс ширийг боловсруулан,  дотоодын хэрэгцээндээ ашиглах импорт орлох бүтээгдэхүүн буюу шахмал түлшний барьцалдуулагч бодис гарган авах туршилт судалгааг хийж эхэлжээ. Лабораторийн туршилтын эхний шатанд барьцалдуулагч бодисоо гаргаж авсан бол цаашид нүүрс, шахмал түлштэй хольж ашиглах технологийг туршихаар бэлдэж байгаа аж. Үр дүнд нь мэдлэг шингэсэн, хаягдал ашиглан үйлдвэрлэлийн чухал ач холбогдолтой, байгаль орчинд ээлтэй органик бүтээгдэхүүн үйлдвэрлэх боломж бүрдэнэ, гэж төслийн багийнхан онцлов. 

     Мөн тус хүрээлэнгийн мэргэжилтнүүд “Зэсийн исэлдсэн болон хоёрдогч сульфидын эрдсүүдийн флотацын идэвхийг сайжруулах сонгомол үйлчлэлтэй урвалжийн судалгаа”-ны төслийг санаачлан эхлүүлжээ. Зэсийн исэлдсэн болон хоёрдогч сульфидын эрдсүүдийн флотацийг тэдгээрт илүү сонгомлоор үйлчлэх урвалж ашиглан нэмэгдүүлэх боломжтой гэж үзсэний үндсэн дээр эл туршилт судалгааг хийж байна. Ингэснээр хам флотаци дахь зэсийн металл авалтыг 0.2%, борлуулалтын орлогыг 6.3 тэрбум төгрөгөөр нэмэгдүүлэх эдийн засгийн үр ашигтай гэж урьдчилсан байдлаар тооцоолжээ.  
 

Сэтгэгдэл бичих

Уншигчдын бичсэн сэтгэгдэлд erdenettoday.mn хариуцлага хүлээхгүй болно. Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.